Мақолалар

Кўп ишлаган камроқ чарчайди

Чоп этилди Sentabr 20, 2019 Кўп ишлаган камроқ чарчайдиda fikr bildirishni o'chirish

Дигор халқ мақоллари ва маталларидан

Дигорлар – осетинлар гуруҳига мансуб халқ. Россиянинг Шимолий Осетия, Кабарда-Болқор Республикаларида, Туркия, Сурия ва бошқа мамлакатларда яшайди. Эрон тиллар оиласига мансуб осетин тилининг дигор шевасида сўзлашади. Бу тилда сўзлашувчилар жуда оз қолган. Умумий адади минг кишидан кам.

 

  • Агар сенга танга сўмдай кўринмас экан, бойимайсан.
  • Бирга бир пуд туз емагунингча, одамнинг қандайлигини билолмайсан.
  • Боғингда ҳосил йўқ бўлса, қуёшни айблама.
  • Болага қўйиб берсанг, кўмирни ҳам ейди.
  • Бутун оила келинни мақтайверди, кейин келин ҳам ўзини ўзи мақташга ўтди.
  • Ёмон бажарилган иш – уч карра оворагарчилик.
  • Ёмон одам фақат бир марта яхшилик қилади – ўлганда.
  • Ер танбаллик нималигини билмайди, танбаллик қиладиган – одам.
  • Иккинчи келин келмагунча биринчиси ҳурмат топмайди.
  • Илонни ҳеч ким қучоқламайди.
  • Итнинг ҳуришига ва мастнинг гапига эътибор берма.
  • Иш бўри эмас, ўрмонга қочиб кетмайди.
  • Ишлашни хоҳлаган тоғ чўққисида ҳам ишлайди.
  • Катта тегирмон озгина сув билан ишламайди.
  • Кичкина болта катта дарахтни қулатади.
  • Кўп ишлаган камроқ чарчайди.
  • Қарзи кўп одам янги қарздан қўрқмайди.
  • Қуёш ухлаб олишингни кутиб ўтирмайди.
  • Майда одам ўзини намуна қилиб кўрсатади.
  • Маслаҳат яхши, лекин узлуксиз маслаҳат яхши эмас.
  • Маънавияти мустаҳкамнинг ақли мустаҳкам бўлади.
  • Музда энг эҳтиёткор одам ҳам сирпанади.
  • Одамни шарманда қилишда қориндан ўтадигани йўқ.
  • Тўғри одамга бировнинг адолатсизлиги ҳам оғриқ беради.
  • Турғун сувни моғор босади.
  • Ўзини шарманда қилган тез орада бошқаларни ҳам шарманда қилади.
  • Умид етакласа, чарчамайсан.
  • Эрта турган афсусланмайди.
  • Эски қарзларни тўлаш оғир бўлади.

 

Рус тилидан Ориф Толиб таржимаси

“Ислом нури” газетасининг 2019 йил, 16-сонидан