Тўртликлар
Яхши ният билан ёруғдир диллар,
Талпинсанг, манзилга элтади йўллар.
Умид бу – Аллоҳнинг азиз неъмати,
Англай бил, дарахт ҳам умид-ла гуллар.
* * *
Илмга ташнадан толиб чиқади,
Олдга интилганлар ғолиб чиқади.
Умрга заволдир ҳасад ила кек,
Умид рўшноликка олиб чиқади.
* * *
Имон қушин қалбга қамагин, эй дўст,
Нафсни тий, кўпни кам демагин, эй дўст.
Даҳри дунда уста чилангар бўлиб,
Синиқ кўнгилларни ямагин, эй дўст.
* * *
Қайларга ҳам етиб боргайдир оҳим,
Бошдаги сочимдан кўпдир гуноҳим.
Яна раҳматингдан умидвор бўлиб,
Сенга юзланаман. Ўзинг – паноҳим.
Қурбон Қарлиқий
«Ислом нури» газетасининг 1-сонидан