Қозоғистонлик журналист: “Бухорода туяни ижарага олиб, олис тарихга саёҳат қилдим”
Бухорога борган киши ўрта асрларга тушиб қолгандек бўлади, деб ёзади қозоғистонлик журналист Алибек Бегалинов.
Олмаота шаҳридан
ЎзА мухбири хабар қилади
Алибек Бегалинов Қозоғистоннинг машҳур the-steppe.com нашрига материал тайёрлаш учун махсус Ўзбекистонга келди. Журналист ўз автомобилида тасвирчилар гуруҳи билан Бухоро, Самарқанд, Тошкент бўйлаб саёҳат уюштирди. У материалларида Бухоро жозибасини тасвирлаш билан бирга, саёҳат қилувчиларга керакли маьлумотларни бериб борган. 250 тенгега туяни ижарага олиб, гўёки олис тарихга қайтган ҳолда Бухоро кўчалари бўйлаб сайр қилиш мумкин, дея маълумот беради журналист.
Алибек биз билан қилган суҳбатда Ўзбекистонда туризмни ривожлантиришга жиддий киришилгани сезилмоқда, дейди. Лекин шунга қарамасдан у чегаралардан машина билан ўтишда кўпроқ ушланиб қолганини ва тенгени сўмга айлантиришда қийинчиликка дуч келганини айтади.
Шунингдек, қозоқ журналисти ижодий гуруҳ билан машинада саёҳат қилгани учун йўлларда ҳайдовчиларнинг ҳаракатланиши ҳам тартибсизроқ эканига эътибор қаратган. Бироқ журналистнинг Ўзбекистон ҳақидаги умумий тасаввурлари ижобий.
“Умуман олганда Марказий Осиёда тарихий обидаларга бой мамлакат Ўзбекистон бўлса керак. Мен юртдошларимга Бухорога, албатта, саёҳат уюштиришни тавсия этаман“, дейди журналист.
ЎзА