Мақолалар

Маърифатга бахшида умр

Чоп этилди Aprel 20, 2019 Маърифатга бахшида умрda fikr bildirishni o'chirish

“Қайси бир мусул­моннинг сочи Исломда оқарса, унга ҳар бир оқ тола баробарида савоб ёзади ва бир хатосини ўчиради” (Имом Абу Довуд ривояти).

Фарғона туманининг Чимён қишлоғидаги «Ҳувайдо» жоме масжиди имом-хатиби (ҳозир имом ноиби) Абдураҳим ҳожи ота Мўминов 1927 йили Чимён қишлоғида темирчи уста оиласида дунёга келди. Ҳаёти мобайнида турли жабҳаларда ишлаш билан бирга илм ўрганди. Оила қуриб, Аллоҳ насиб этган беш нафар фарзанд – икки қиз, уч ўғилни ҳалол едириб ичирди, тарбиялади.

Истиқлол шабадаси эса бошлагач, бир қан­ча қишлоқлар маркази бўл­ган Чимён қиш­лоғида “Ҳу­вайдо” жоме масжидини бунёд этишга киришилди. Маърифатга ташна, савоб­талаб Абдураҳим ҳожи Мў­миновнинг ёнига Ҳамид ота Аҳмедов, Ғофурҳожи Чўта­нов, Собир ҳожи Обидов, Аб­ду­раим Султонов, Муҳаммад­карим Тўхтасинов, Раҳим ҳо­жи Тешажонов каби кўплаб фидойи, саховатпеша инсонлар қўшилиб, янги масжид қурилиши бошланди. Ҳашар­га бутун қишлоқ ва қўшни қишлоқлардан инсонлар кела бошлади. Замон талабига мос бўлган, шарқона услубда барпо қилинган намозгоҳда ҳозир ҳам қурилиш ишлари тингани йўқ.

Ушбу масжидга Абдураҳим ота 1989 йилдан имом-хатиб­лик қила бошлади. Домла ҳануз одамларни, айниқса, ёшларни илм олиш, маърифатли бўлиш, бирор касб эгаллашга даъват қилади. Шунинг учун бўлса керак, қишлоқда ёшларнинг ножўя оқимларга кириб кетиши кузатилмаган, оилавий ажримлар сони анчайин кам.

92 ёшни қарши олган ҳожи ота жума, ҳайит намозларида имомликка табаррукона ўтиб беради, минбарда маърузалар қилади. У кишининг ўгит ва насиҳатлари бизга дастуриламалдир.

Ҳусанбой ҚУРБОНОВ,

Халқ таълими аълочиси

“Ҳидоят” журналининг 2019 йил, 3-сонидан