Хом гапга пишиқ жавоб – Қандай сифатласанг, ўшандай жавоб оласан
Бир одам Баҳлул донога:
– Эй Баҳлул доно! Деҳқончилик қилмоқчиман, нима экишни маслаҳат берасан? – деди.
Баҳлул доно:
– Пиёз эк! – дедилар.
Ўша одам пиёз экди ва мисли кўрилмаган даражада катта фойда кўрди. Кузда яна Баҳлул донони учратиб:
– Эй Баҳлул девона! Бу йил нима экишни маслаҳат берасан? – деди.
Баҳлул доно:
– Пиёз эк! – дедилар.
Ўша одам пиёз экиб шундай қаттиқ зарар кўрдики, ўтган йили олган фойдаси ҳам зарарига қўшилиб кетиб қолди.
Жаҳл отига миниб Баҳлул девонанинг олдига борди ва унга:
– Ўтган йили тўғри маслаҳат берган эдинг, бу йил нега бундай қилдинг? – деди.
Баҳлул доно:
– Ўтган йили “доно” деган эдинг, донишмандларга хос маслаҳат бердим. Бу йил “девона” дединг, девоналарга хос маслаҳат бердим, – дедилар.