440 нафар киши хурмодан тановул қилди, аммо хурмо аввал қандай бўлса, шундайлигича қолди
Дукайн ибн Саъид Хасъамий (розияллоҳу анҳу)дан ривоят қилинади:
«Бизлар 440 нафар киши Расулуллоҳ (соллаллоҳу алайҳи ва саллам)нинг ҳузурларига егулик учун таом сўраб келдик. У зот (соллаллоҳу алайҳи ва саллам) Умарга[1] қараб: “Тур, уларни таомлантир”, дедилар.
– Ё Расулуллоҳ! Менда фарзандларимга тўрт ойгагина етадиган озуқа бор, холос, – деди.
– Тур, уларга бер, – дедилар.
– Ё Расулуллоҳ! Эшитаман ва итоат қиламан, – деди ва ҳужрасидан калитни олиб чиқиб, озуқа сақланадиган хонани очиб берди. Эшик очилгач, қарасам, унда бир уюм ерга ёйиб қўйилган хурмо бор экан.
– Олинглар, – деди. Ҳар бир киши ўзига керагича хурмони олди, мен эсам уларнинг энг охиргиси эдим. Хурмоларни олиб бўлгач, қарасам, хурмолар бир дона ҳам камаймагандек турарди»[2].
[1] Умар ибн Хаттоб (розияллоҳу анҳу).
[2] Имом Аҳмад ривояти.

Усмонхон АЛИМОВнинг
“Расулуллоҳ (соллаллоҳу алайҳи ва саллам) мўъжизалари” китобидан
Асар “Мовароуннаҳр” нашриётида чоп этилган.
Нашриётдан харид нархи 23000 сўм