Аллоҳ муҳсинларни яхши кўради
Эзгулик қилувчилар атрофимиздаги ғофилларнинг уйғонишларига имкон қадар ёрдамлашишлари лозим.
Ислом – адолатли дин. У махлуқнинг ҳақини Холиқнинг ҳақидан муқаддам қўяди. Яъни, сиз фарз бўлган ҳаж амалини бажариш учун етарли миқдорда маблағингиз бор. Аммо бир мусулмондан ана шу маблағ миқдорича қарздорсиз. Бу ҳолатда энг аввал қарзингиздан қутуласиз ёки ҳақдордан қарзни тўлаш ўрнига ҳажга бориш учун изн беришини сўрайсиз. Зеро, банданинг ҳақи Аллоҳнинг ҳақидан муқаддамдир.
Ёрдам сўрашга ботина олмай турган бечора-мискинлар бизга қиёматдаги аҳволимизни, Аллоҳнинг ҳузурида ёрдам сўрашга ботинолмай турган мулзам аҳволимизни эслатишга ҳақлидир.
Аллоҳ таоло эзгулик қилувчилар билан биргадир. Мискиннинг кўнглини обод қилиш Аллоҳ ризосига эришиш йўлларидандир.
“Ҳидоят” журналининг 2019 йил, 8-сонидан