«Миллион сўмлик» сомса
Дўконма-дўкон юриб овқат қилолмаган хотин дастурхон ёзаётиб мақтай кетди:
– Дадаси, “Марказ – 5”да янги сомсахона очилган экан, югуриб бориб-келдим. Нархиям қиммат эмас, тўрттаси ўн минг экан. Олинг, мазаси зўр.
Эр зарда аралаш деди:
– Кечагина “Марказ – 4”никини мақтаб келтирувдинг, пиёзга ботиб қолдим. Таъми ҳалиям оғзимда…
Очлиги учун ноилож дастурхонга қўл чўзди. Хотин дадилланди.
– Бугунгиси бошқача, тандирники, дадаси.
Орадан уч кун ўтди. Хотин ишдан келган эрига пешвоз чиқди. «“Марказ – 6”га борайлик», деб машинага чиқиб олди.
– Яна овқат йўқ, яна болалар онамникидами?
Энди эрнинг ғазаби келди. Яп-янги уловини бураётиб бетон тўсиққа уриб олди. Хотин пусибгина уйга, эр устахонага йўл олди.
Кеч кирди. Ҳориб-чарчаб, қовоғидан қор ёғиб келган эри олдига хотин иссиққина сомса қўяр экан гап бошлади:
– Дадажониси, сиз учун олиб келдим. Қаранг, саксовул оловида пиширишган экан. Тўрттаси…
– Тўрттаси тўрт миллион бўлди, арзонгина! Қани олинг, ош бўлсин! – деди бўғилиб эр.
Дилором КАРИМОВА
“Мўминалар” журналининг 2019 йил, 3-сонидан