Саудия Арабистони валиаҳд шаҳзодаси ва Исроил бош вазирининг учрашиши кутилмоқда
Яқинда Миср пойтахти Қоҳирада бўлиб ўтадиган саммитда Саудия Арабистони валиаҳд шаҳзодаси Муҳаммад ибн Салмон ва Исроил бош вазири Биньямин Нетаньяҳунинг учрашиши кутилмоқда.
«Исраэль хайом» нашрининг ёзишича, АҚШ давлат котиби Майк Помпео охирги бир неча ойдан бери Исроил ва Саудия Арабистони ўртасида воситачилик қилмоқда.
Март ойига мўлжалланган саммитда АҚШ, Исроил, БАА, Баҳрайн, Ўмон ва Судан вакиллари қатнашади. Иордания қироли ҳам таклифнома олган, бироқ унинг иштироки ҳозирча номаълум: у анжуманга Фаластин вакилларининг ҳам таклиф этилишини истамоқда.
Қоҳирадаги саммит АҚШ президенти Дональд Трамп маъмуриятининг ташаббуси билан ташкил этилмоқда. Оқ уй фаластлинликларга ушбу саммит уларнинг минтақадаги дипломатик музокараларда қатнашиши учун охирги имконият бўлиши мумкинлигиги айтган.