Тилни гуноҳлардан тийиш
Пайғамбаримиз (соллаллоҳу алайҳи ва саллам) ўз муборак васиятларининг бу қисмида инсон ҳаёти ва охирати учун энг муҳим аъзолардан бири бўлган тилдан келадиган хатарлар ҳақида хабар беряптилар.
Барчамизга маълумки, Аллоҳ таоло инсонларга беҳисоб неъматларини ато этган. Улар ичида тану жоннинг саломат бўлиши энг улуғ неъматлардан бўлиб, бу биз бандаларга Аллоҳ таоло берган омонат ҳамдир. Бу неъматни хайрли ишларга ишлатиш ва ёмон ишлардан сақлашга буюрилганмиз. Жисмимизнинг асосий бир бўлаги бўлган тилни ножўя сўзлардан сақлаш ҳақида сўз юритамиз. Тил инсонларнинг ўзаро муомалаларида фикрларини баён этишлари, ички кечинмаларини ифодалашлари учун, айниқса, Аллоҳни зикр этиш ва Қуръон тиловат қилиш, одамларни ҳидоят йўлига чақириш каби Аллоҳ рози бўладиган ўринларда ишлатиш учун берилгандир. Тил инсоннинг ақл-идроки ва маънавиятини намоён этувчи асосий аъзодир. Аллоҳ таоло марҳамат қилади:
«Ахир Биз унга икки кўз, тил ва икки лаб пайдо қилмадикми?!» (Балад, 8–9).
Бошқа оятда эса, нутқ инсонга берилган улкан фазл ва марҳамат экани зикр қилинади:
«Ар-Раҳмон (меҳрибон зот) Қуръонни таълим берди. (У) инсонни яратди. Унга баённи (нутқни) таълим берди» (Ар-Раҳмон, 1–4).
Шундай экан, тил билан фақат хайрли, яхши сўзларни гапириш, уни ғийбат, туҳмат, ёлғон, ҳақорат, чақимчилик кабилардан сақлаш лозим. Тилдан келадиган офатлар кўп бўлиб, улар қалбни тош қилиб қўяди. Мана шу офатлардан қутулишнинг энг осон йўли сукут сақлашдир.
Бу борада Пайғамбаримиз (соллаллоҳу алайҳи ва саллам): “Кимки Аллоҳ таолога ва охират кунига имон келтирган бўлса, фақат яхши нарсаларни гапирсин ёки жим юрсин”, деганлар.
Умри давомида вақтнинг қадрига етган одам уни фойдасиз нарсага сарфламайди. Чунки Аллоҳ таолонинг зикрини қўйиб, ботил, бемаъни гаплар билан машғул бўлиш мумкин эмаслигини билади.
Пайғамбаримиз (соллаллоҳу алайҳи ва саллам) бундай марҳамат қиладилар: “Менга энг ёмон кўринадиганингиз ва қиёмат куни мендан энг узоқ бўладиганингиз, оғзини тўлдириб кўп гапирадиганингиз ва мутакаббирлик қиладиганингиздир”.
Ҳазрат Умар (розияллоҳу анҳу) ҳам: “Кимнинг гапи кўпайса, хатоси ҳам кўпаяди”, деганлар. Ҳакимлардан биридан: “Сени бунчалик ҳикматга нима етказди?” деб сўралганида, “Билган нарсамни сўрамайман, кераксиз нарсани гапирмайман”, деб жавоб берган.
Тил инсон аъзолари ичидаги энг кичиги бўлишига қарамай, у бошқа аъзолар қила олмайдиган ишларни қилишга қодирдир. Тилнинг тўғри бўлиши бошқа аъзоларнинг иши яхши бўлишига сабаб бўлади. Расулуллоҳ (соллаллоҳу алайҳи ва саллам): “Банданинг имони мукаммал бўлмайди, токи қалби тўғри бўлмагунча. Қалби тўғри бўлмайди, токи тили тўғри бўлмагунча”, деб марҳамат қилганлар.
Мўмин-мусулмон бандалар икки дунёнинг олий мақомига эришмоқчи бўлсалар, улкан гуноҳлар, фаҳш ва қабиҳ, уят иш ва ёмон сўзлардан узоқ бўлишлари лозим.
Бинобарин, айрим бекорчи, дангаса маҳалла-кўйларда, кўча ва гузарларда ўтириб олиб, ғийбат гаплардан гапириб, ўтган-кетганларга баҳо берувчи ёмон кимсалар ҳам мазкур оят ва ҳадисларда зикр этилганлар ҳукмида эканлигини унутмасликлари керак.
Қуръони каримда марҳамат қилинади:
«Айтинг: “Раббим, албатта, фаҳш ишларнинг ошкораю пинҳонасини, гуноҳ (ишлар)ни, ноҳақ тажовузкорликни ва Аллоҳ ҳеч қандай ҳужжат туширмаган нарса(лар)ни Унга шерик қилишингизни ҳамда Аллоҳнинг шаънига ўзингиз билмаган нарсаларни гапиришингизни ҳаром қилди» (Аъроф, 33).
Пайғамбаримиз (соллаллоҳу алайҳи ва саллам) ҳадисларида бундай марҳамат қилганлар: “Аллоҳ таоло уятсизликни ва беҳаё гаплар гапирилишини хуш кўрмайди”.
Аллоҳ таоло мўмин бандаларни сифатлаганда уларнинг фаҳш, қабиҳ ва уятсиз сўз ва ишлардан четда бўлишларини таъкидлаган.
Аллоҳ таоло марҳамат қилади:
«Улар катта гуноҳлардан ва бузуқликлардан четланадиган, ғазабланган вақтларида эса кечириб юборадиган зотлардир» (Шўро, 37).
Инсон аъзолари ичида энг хатарлиси бўлгани учун ҳам Аллоҳ таоло уни лаблар ортидаги тишли икки жағ орасига яширган. Шу сабабли ҳам Расулуллоҳ (соллаллоҳу алайҳи ва саллам) мусулмонларнинг энг афзали ҳақида: “Ҳақиқий мусулмон бошқалар унинг тили ва қўлидан саломат бўлган кишидир”, деб марҳамат қилганлар.
Яна бир ҳадиси шарифда: “Тилига эга бўлган, уйи уни сиғдирган ва хатоларига йиғлайдиган кишига қандай ҳам яхши”, деганлар. Муоз ибн Жабал (розияллоҳу анҳу)дан ривоят қилинган ҳадиси шарифда бундай дейилади: «Мен: “Ё Расуллуллоҳ, мени жаннатга киритиб, дўзахдан узоқлаштирадиган амал ҳақида хабар беринг”, дедим. Расуллуллоҳ (соллаллоҳу алайҳи ва саллам): “Жуда катта нарса ҳақида сўрадинг, лекин у Аллоҳ таоло осон қилганлар учун енгилдир. Аллоҳга ибодат қилиб, Унга шерик келтирмайсан, намозни қоим қиласан, закотни адо қиласан, Рамазон (рўзасини) тутасан ва байт (Каъба)ни ҳаж қиласан”, дедилар. Сўнг: “Сенга яхшиликлар эшигига далолат қилмайинми? Рўза қўрғондир, садақа хатони сув оловни ўчиргани каби ўчирур, кишининг зим-зиё кечадаги намози…”, дедилар. Сўнг «Уларнинг ёнбошлари (ибодат қилиш учун) ўриндиқлардан ажраб турар (оз ухлайдилар). Улар Парвардигорларига қўрқув ва умидворлик билан дуо қилурлар ва Биз уларга ризқ қилиб берган нарсалардан эҳсон қилурлар. Бас, уларнинг қилиб ўтган амалларига мукофот учун яшириб қўйилган кўзлар қувончини (охират неъматларини) ҳеч ким билмас» (Сажда, 16–17), деган оятни тиловат қилдилар. Сўнг: “Ишларнинг боши, устуни ва чўққиси ҳақида хабар берайинми?” дедилар. Мен: “Ҳа, ё Расулуллоҳ”, дедим. “Ишнинг боши Ислом, унинг устунлари намоз, чўққиси эса нафсга қарши жиҳоддир”, дедилар. Сўнг: “Мен сенга буларнинг барчаси… ҳақида хабар берайинми?” дедилар. Мен: “Ҳа, ё Расулуллоҳ”, дедим. Тилларини ушладилар ва: “Ўзингни мана бундан сақла”, дедилар. Мен: “Ё Аллоҳнинг Набийи, гапирган нарсаларимиздан ҳам сўраламизми?” дедим. Шунда: “Онанг сени йўқотиб қўйгур, одамларни тилининг ҳосилидан бошқа нарса дўзахга юзтубан қилиб ташлайдими?” дедилар».
Ушбу ҳадиси шарифда Расулуллоҳ (соллаллоҳу алайҳи ва саллам) динимизга оид кўп нарсалар ҳақида хабар бериб, улар ичида тилга алоҳида эътибор ва урғу бераётганлари бежиз эмас. Чунки тил орқали киши кўплаб гуноҳларни орттириб олганини билмай қолади.
Гапиришнинг бир неча шартлари бўлиб, уларга риоя қилинмаса, хатодан қутулиш имконсиз бўлади.
Биринчи шарт, бирор фойда келтирадиган ёки зарарни қайтарадиган бўлиши.
Иккинчи шарт, ўз ўрни ва фурсатида бўлиши.
Учинчи шарт, эҳтиёж миқдорида қисқа бўлиши.
Тўртинчи шарт, гаплардаги лафзларни танлаб, энг афзал деб билганини гапириш.
Агар гапириш учун тўғри нарсани топа олмаса, жим туриши керак. Чунки нотўғри нарсани гапирмасликнинг ўзи ҳам яхшиликдир. Бу борада уламолар бундай дейдилар: “Фойдаси бўлмаган ҳар қандай гапдан сақланиш керак. Агар гапириш ва жим туриш тенг бўлиб қолса, жим туриш афзалдир. Чунки мубоҳ бўлган гап бориб-бориб ҳаром ёки макруҳ гапга айланиб кетиши мумкин”. Дарҳақиқат, эътибор берилса, кўп ҳолларда шундай бўлади.
Имом Шофиъий (раҳматуллоҳи алайҳ) бундай деганлар: “Агар инсон гапиришни хоҳласа, гапиришдан олдин фикрлаб кўрсин. Агар фойда кўринса, гапирсин, акс ҳолда, то фойдали бўлишига ишонгунга қадар жим турсин”.
Демак, мусулмон одам ёмон гаплардан сақланиши даркор. Чунки хунук гаплар эгасининг ҳурматини кетказиб қўяди.
Ҳазрат Али (розияллоҳу анҳу) бу ҳақда: “Киши тили остига беркитилгандир. Агар у гапирса, унинг қандайлиги кўрина бошлайди”, деганлар.
Бирор танимаган одам билан кўришганда, у киши билан суҳбатлашмагунча, қандай эканини билиб бўлмайди. Суҳбат давомида унинг гап-сўзлари ким эканини яхшироқ кўрсатиб беради. Яна ҳазрат Али (розияллоҳу анҳу) бу борада: “Оқилнинг тили қалбининг ортидадир, аҳмоқнинг қалби тилининг ортидадир”, деганлар. Яъни, оқил одам гапиришдан аввал фикрлаб кўради. Агар қалби таскин топса, гапиради. Аҳмоқ эса аввал ўйламасдан гапиради. Кейин қалби билан хижолат ва надомат чекади.
Тил воситасида ғийбат, чақимчилик, туҳмат, ёлғон каби кўплаб гуноҳ содир қилинади.
Ғийбат бошқа бир одам ҳақида унга ёқмайдиган нарсаларни гапиришдир. Бировни ғийбат қилиш мумкин эмас. Аллоҳ таоло марҳамат қилади:
«Эй мўминлар! Кўп гумон(лар)дан четланингиз! Чунки баъзи гумон(лар) гуноҳдир. (Ўзгалар айбини қидириб) жосуслик қилмангиз ва бирингиз бирингизни ғийбат қилмасин! Сизлардан бирор киши ўлган биродарининг гўштини ейишни хоҳлайдими?! Уни ёмон кўрасиз-ку, ахир! Аллоҳдан қўрқингиз! Албатта, Аллоҳ тавбаларни қабул қилувчи ва раҳмли Зотдир» (Ҳужурот, 12).
Бу ўринда Аллоҳ таоло ғийбат қилиш жуда катта гуноҳ бўлганлиги сабабли уни ғийбат қилинган одамнинг гўштини ейиш билан тенглаштиряпти. Ғийбат қилишнинг ёмонлиги ҳақида бир қанча ҳадиси шарифлар мавжуд.
Пайғамбаримиз (соллаллоҳу алайҳи ва саллам) Абу Ҳурайра (розияллоҳу анҳу)дан ривоят қилинган ҳадисда ғийбат ҳақида бундай дедилар: “Ғийбат нима эканини биласизларми?” дея сўрадилар. Саҳобалар: “Аллоҳ ва Расули билувчидир”, дедилар. Шунда Расулуллоҳ (соллаллоҳу алайҳи ва саллам): “Биродаринг эшитса, хафа бўладиган нарсани зикр қилишингдир”, дедилар. Бир киши: “Агар биродаримда мен айтган нарса (айб) бўлса-чи?” деди. Расулуллоҳ (соллаллоҳу алайҳи ва саллам): “Агар унда сен айтаётган нарса бўлса, сен уни ғийбат қилибсан, агар бўлмаса, сен унга туҳмат қилибсан”, дея жавоб бердилар.
Мазкур ҳадиси шарифдан кўриниб турибдики, ғийбат бировда мавжуд бўлган айбни бошқаларга айтишдир. Баъзилар ўзини оқлаш мақсадида, мен йўқ нарсани айтмаяпман, унда ўша айблар бор, деб даъво қилади. Демак, айнан мана шу даъво ғийбат бўлар экан. Агар у одамда айтилаётган айблар бўлмаса, бу ғийбат эмас, балки у одамга нисбатан туҳмат ва бўҳтон бўлиб қолар экан.
Ғийбат қилишнинг бир қанча ёмон тарафлари бор. Ғийбат қилиш натижасида одамнинг обрўси тўкилади, ҳурмати кетади, жамиятда унга ишонч йўқолади, низо ва адоватлар келиб чиқади. Бировнинг айби ва гуноҳидан ҳамма хабар топади. Ваҳоланки, Ислом динида бировнинг айбини кўриб қолса, уни яшириш, бошқаларга айтмаслик буюрилган.
Ҳозирги даврда кўплаб оилаларнинг бузилиб кетишига, ака-уканинг юзкўрмас бўлиб қолишига айнан ғийбат сабаб бўлаётгани ҳаммага маълум.
Ғийбат қилишга бир неча омиллар сабаб бўлади. Кимдир ғийбат қилинаётган одамга нисбатан нафрати ва адовати боис, кимдир бировнинг айбини айтиш билан ўзида шу нуқсоннинг йўқлигини кўрсатиш учун, яна кимдир ғийбатчи ҳамсуҳбатининг гапларига қўшилиш учун, яна кимдир, ғийбат қилинаётган одамнинг устидан кулиш учун, яна кимлардир жўяли гап топа олмагани учун ғийбат қилади.
Ғийбат фақат тирик одамлар ҳақида бўлмай, балки ўликлар, яъни вафот этиб кетган одам ҳақида ҳам бўлади. Ўтиб кетган одамларни ғийбат қилишнинг гуноҳи тирикларни ғийбат қилишдан кўра оғирроқдир. Чунки тирик одамдан кейинчалик узр сўралса, у кечириши мумкин, лекин ўлган одам борасида ундай имконият йўқ. Шу билан бирга, ҳадиси шарифларда: “Ўтганларингизнинг яхши тарафларини зикр қилинглар, уларнинг ёмон тарафларидан тийилинглар”, дея марҳамат қилинган.
Бирор гуноҳ қилиб қўйилса, тезда тавба қилиш зарур. Ғийбатнинг тавбаси ғийбат қилинган одамдан айтган гапи учун кечирим сўрашдир. Агар бу нарса янада каттароқ ёмонликларга, жанжалнинг кўпайишига олиб бориш эҳтимоли кўп бўлса, у одамни ёмонлаб ғийбат қилган жойларда унинг яхши тарафлари ва фазилатларини зикр қилиш ҳамда у одам ҳақида бошқалар тарафидан қилинадиган ғийбатларни имкон қадар тўхтатиш билан кифояланади. Бунда, биринчи навбатда, Аллоҳдан қилган ишини мағфират этишини сўраб, илтижо қилади.
Тил ёрдамида қилинадиган катта гуноҳлардан яна бири чақимчиликдир. Чақимчилик бировнинг бошқалар билишини хоҳламаган гапи ёки бирор ишини бошқаларга етказишдир. Яъни, одамлар орасида уларнинг ўртасини бузиш учун бирининг гапини бошқасига етказишдир.
Аллоҳ таоло марҳамат қилади:
«(Эй Муҳаммад!) Ҳар қандай тубан қасамхўрга (Валид ибн Муғирага) итоат этманг! (У) ғийбатчи, гап ташувчи, яхшиликни ман этувчи (бахил), тажовузкор, гуноҳкор, қўпол ва булардан ташқари бенасаб (ҳароми)дир…» (Қалам, 10–13), дея Ислом душмани Валид ибн Муғиранинг бир қанча ёмон сифатлари баробарида “гап ташувчи”, яъни чақимчилик сифатини келтириши бу ишни Аллоҳ таоло суймаслигини билдиради.
Ҳузайфа (розияллоҳу анҳу)дан ривоят қилинган ҳадиси шарифда Пайғамбаримиз (соллаллоҳу алайҳи ва саллам): “Чақимчи жаннатга кирмайди”, деганлар.
Ибн Аббос (розияллоҳу анҳу)дан ривоят қилинади: «Пайғамбаримиз (соллаллоҳу алайҳи ва саллам) Мадина ёки Макка қабристонларининг бири ёнидан ўтиб кетаётган эдилар. Тўсатдан иккита қабрдан азобланаётган кишиларнинг инграган товушини эшитиб қолдилар. “Азобланаяптилар, аммо кабира гуноҳ учун азобланмаяптилар”, дедилар. Бир оздан сўнг: “Йўқ, (кабира гуноҳ сабабли азобланаяптилар), бири бавлидан, яъни пешобидан сақланмас, иккинчиси эса чақимчилик қилиб юрар эди”, дедилар. Сўнгра, хурмонинг кўкариб турган шохидан олиб келишни буюрдилар. Шох олиб келингач, уни иккига бўлиб, ҳар бир қабрга биттадан бўлакни санчиб қўйдилар. Саҳобалар: “Ё Расулуллоҳ, нега бундай қилдингиз?” деб сўрашди. Шунда у зот: “Шояд, бу шохлар қуригунча азоблари енгиллашиб турса”, деб жавоб бердилар».
Ушбу ҳадисда айтилган воқеа Мадинада ёки Маккада бўлгани устида ровий шубҳа қилаётган бўлса-да, энг муҳими, бу воқеа бўлиб ўтган. Расулуллоҳ (соллаллоҳу алайҳи ва саллам) Мадинаи мунавварада “Бақиъул ғарқад” қабристонини тез-тез зиёрат қилиб турар эдилар.
Ана шундай одатий зиёратлардан бирида, Аллоҳ таоло Расулуллоҳ (алайҳиссалом)га мўъжиза тариқасида иккита қабрда азобланиб ётган кишининг товушини эшиттирди. Бу товушни ўша ерда турганлар орасида Расулуллоҳ (соллаллоҳу алайҳи ва саллам)дан бошқа ҳеч ким эшитмади. Аввалига, Расулуллоҳ (соллаллоҳу алайҳи ва саллам) уларни: “Кабира гуноҳ учун азобланмаяптилар”, дедилар. Яъни, уларнинг азобланишларига сабаб бўлган гуноҳ уларнинг наздида катта гуноҳ эмас, дедилар. Бир зум ўтмай: “Бири бавлидан, яъни пешобидан сақланмас, иккинчиси эса чақимчилик қилиб юрар эди”, деб қилган гуноҳларини айтдилар. Ушбу ҳадисдан маълум бўладики, мазкур гуноҳлар қабр азобига сабаб бўлиши мумкин экан.
Бавлдан сақланмаслик деганда, унинг кийимларга тегиб кетишига бепарво бўлиш ёки бавл қилаётганда одамларнинг назари тушишидан сақланмаслик деган маъноларни тушуниш мумкин. Ҳар иккиси ҳам мусулмончиликка тўғри келмайдиган ҳолат бўлиб, биринчиси, нопоклик бўлса, иккинчиси, ҳаёсизлик саналади. Кийим нопок бўлгандан кейин, у билан ўқилган намоз ҳам мақбул бўлмайди. Ҳаёсиз кишида эса имон бўлмайди. Шундай экан, мўмин-мусулмонлар бундан жуда эҳтиёт бўлмоқлари лозим.
Бир одамнинг гапини бошқага етказадиган, одамлар орасида гап ташиб юрадиган кишилар чақимчи дейилади. Чақимчи кимсадан кўра ёлғончироқ одам бўлмайди. Чунки у бир гапни эшитса, унинг моҳиятига тушунса, тушунмаса, бошқа одамга олиб бориб гапираверади. Расулуллоҳ (соллаллоҳу алайҳи ва саллам) ҳадисларининг бирида: “Эшитган гапини айтаверадиган одамдан ёлғончироқ киши йўқдир”, деганлар. Энг муҳими, чақимчи биринчи галда бу қилмиши орқали одамларга панд бериш, бошига ташвиш келтириш, оғир аҳволга солиб қўйишни мақсад қилади. Демак, чақимчининг иши, шунчаки гап ташиш эмас, балки ёмон ниятни амалга оширишдир. Шунинг учун ҳам Расулуллоҳ (соллаллоҳу алайҳи ва саллам) чақимчиликни катта гуноҳлар қаторига қўшганлар.
Аллоҳ таоло бизга неъмат қилиб берган тилимизни фақат яхши ва савоб ишларни қилишга восита қилайлик, у бошқаларга зарар ва азият етказмайлик.
Усмонхон АЛИМОВнинг
“Расулуллоҳ (соллаллоҳу алайҳи ва саллам)нинг муборак васиятлари” китобидан (2-жилд)
Асар “Мовароуннаҳр” нашриётида чоп этилган.
Нашриётдан харид нархи 26 000 сўм