Байрутда 300 минг киши уйсиз қолди, моддий зарар катта
Ливан пойтахти Байрутда кеча, 4 август куни рўй берган портлаш оқибатида 100 дан зиёд киши ҳалок бўлди, 4 мингдан ортиқ киши жароҳат олди. Ярадорлар сони кўплиги туфайли қурбонлар сони ортиши мумкинлиги тахмин қилинмоқда.
Ҳодисадан кейин камида 100 киши бедарак йўқолгани, вайроналар остида қолганлар сони кўплиги айтилмоқда. Қидирув-қутқарув ишлари давом этмоқда.
Байрут ҳокими Марва Абуд AFP агентлигига берган интервьюсида пойтахтнинг ярми зарар кўрганини ва тахминан 300 минг киши уйсиз қолганини маълум қилди. Унинг тахминига кўра, портлаш 3-5 миллиард доллар зарар етказган.
Ливан бош вазири Ҳасан Диабнинг айтишича, портлашга пойтахт портида хавфли шароитда сақланган 2750 тонна аммиакли селитра сабаб бўлган.