Муносиб авлодлар беллашуви
Мовароуннаҳр заминидан етишиб чиққан буюк муҳаддислар Имом Доримий, Имом Бухорий, Имом Термизий, Абдуллоҳ ибн Муборак, Ибн Ҳиббон, Ҳайсам ибн Қулайб Шоший, Абу Бакр Аҳмад ибн Муҳаммад Барокотий, Иброҳим ибн Маъқил Насафий ва Абд ибн Ҳумайд Кешийлар томонидан ҳадис мактабларига асос солинган бўлиб, ушбу илму маърифат ва зиё масканлари ҳадис илми ривожи ҳамда дунё илм-фан тараққиётида ўчмас из қолдирган.
Зеро, ҳадисларда инсон ҳаётининг барча қирраларини қамраб оладиган кўрсатмалар ҳамда ижтимоий ва диний масала-муаммолар ечими баён этилган.
Ҳадисларда Ислом дини аҳкомлари, ахлоқ-одоб ва бурчларга оид кўрсатмалар, ибодатнинг тартиб-қоидалари ва уларни мукаммал бажаришга даъват этиш билан бирга инсоний фазилатлар ҳам кенг тарғиб қилинади.
Имом Бухорий номидаги Тошкент ислом институти “Ҳадис ва Ислом тарихи фанлари” кафедраси яқинда “Имом Термизийга муносиб авлод бўлайлик!” шиори остида ўтказган ҳадис мусобақаси ҳам аждодларимизга муносиб издошлар етишиб чиқаётганидан дарак беради. Унда Ўзбекистон мусулмонлари идораси котибият бўлими мудири Муҳаммадаюб Ҳомидов, мутасадди раҳбар ва устоз-мураббийлар қатнашди.
Тадбирда институтнинг иккинчи курс талабалари гуруҳларга бўлинган ҳолда ўзаро беллашди. Ҳакамлар иштирокчиларни 4 шарт асосида баҳолаб боришди. Унга кўра иштирокчилар Имом Нававийнинг “Арбаин” асаридан парча берилган ҳадис давомини айтиб, шарҳлашди, Умар ибн Муҳаммад ибн Байқунийнинг “Манзуматул Байқунийя” асаридан олинган матнни ёддан айтиб, мавзуни тўлиқ ёритишди, Имом Термизийнинг “Сунани Термизий” асаридаги “Таҳорат” ва “Намоз” бобларидаги ҳадисларни ёддан ўқишди. Сўнгги шарт эса улуғ муҳаддис боболаримиз ҳаётидаги ибратли воқеалардан бирини саҳна кўриниши тариқасида кўрсатиб бериш бўлди. Натижаларга кўра, “Бухорий авлодлари” гуруҳига биринчи, “Термизий авлодлари”га иккинчи, “Доримий авлодлари”га эса учинчи ўрин насиб қилди.
Бундан ташқари, танловнинг савол-жавоб йўналиши бўйича Ҳумоюддин Нодиров, мақолалар йўналишида Исохон Яҳё биринчи ўринга муносиб топилди.
Тадбир сўнгида ғолиблар ҳамда Имом Нававийнинг “Арбаин”, Умар ибн Муҳаммад ибн Байқунийнинг “Манзуматул Байқунийя” асарини тўлиқ ёдлаган 25 нафар талаба диплом ва эсдалик совғалари билан тақдирланди.
Бу каби мусобақалар юртимизда ҳадис илмини ўрганиш янада жонланишига, ёшларимизнинг Пайғамбаримиз соллаллоҳу алайҳи ва саллам суннатларини катта иштиёқ билан ўрганишларига хизмат қилади.
Институт Матбуот хизмати
“Ҳидоят” журналининг 2019 йил, 3-сонидан