Фаластинда Араб давлатлари лигасини “дафн қилишди”
Иордан дарёсининг ғарбий соҳилида Араб давлатлар лигасини рамзий дафн этиш маросими бўлиб ўтди, дея хабар бермоқда “Анадолу” агентлиги. Ташкилот Бирлашган Араб Амирликлари (БАА)нинг Исроил билан алоқаларини нормашллаштирганини қоралашни рад этгач, фаластинлик ёшлар ўз муносабатини шу тарзда билдирди.
Калкилия шаҳри яқинидаги Кафр-Каддум алоҳи пунктида бўлиб ўтган рамзий маросимда Араб давлатлари лигасининг логотипи ёпиштирилган тобут кўчалардан олиб ўтилди. Шундан сўнг жаноза ҳам ўқилди.
Фаластин БААнинг қарорини қораловчи резолюция лойиҳасини Араб давлатлари лигасига киритган эди, бироқ ташкилотга аъзо мамлакатлар қўллаб-қувваламагач, лойиҳани қайтариб олди. “Биз Исроил ва БАА ўртасидаги келишувни рад этамиз”, – деди Фаластин Ташқи ишлар вазири Риёз Маликий.
Кеча, Баҳрайн ҳам Исроил билан дипломатик алоқа ўрнатиши ҳақида эълон қилинди. Бунга жавобан Фаластин Баҳрайндаги элчисини чақириб олди.