Юрак хасталиклари давоси
Аллоҳ Каломининг Шарҳ ва Тоҳо сураларидан ушбу оятларни ўқиб, ўнг қўл билан касалнинг кўкраги уқаланади: «(Эй Муҳаммад!) Кўксингизни (илму ҳикматга) кенг очиб қўймадикми?! Сиздан юкингизни олиб қўйдик (енгиллатдик), қайсики, белингизни эзиб турган эди. Зикрингизни (исмингизни) ҳам баланд кўтариб қўйдик. Бас, албатта, ҳар бир қийинчилик билан бирга енгиллик бордир. Албатта, ҳар бир қийинчилик билан бирга енгиллик бордир. Бас, (эй Муҳаммад!) Қачонки, (намоздан) фориғ бўлсангиз, (ўрнингиздан) туринг ва Раббингиз сари рағбат (билан дуо) қилинг!» (Шарҳ сураси).
«(Мусо) деди: “Эй Раббим! (Бу қийин вазифага) бағримни кенг қилгин ва ишимни осон қилгин ҳамда тилимдан тугунни (дудуқликни) ечиб юборгин, (токи) улар (қавмим) гапимни (яхши) англасинлар” (Тоҳо сураси, 25–28-оятлар).
Фотиҳа сурасини Замзам сувига ўқиб, уни ичиш ва кўксига суриш юракни бақувват қилади, оғриқларни кетказади. Тамаки каби зарарли нарсаларни чекиш, бундай номақбул ишни одат қилган одамлар билан ўтиришдан ҳамда беҳуда сўзларни сўзлашдан сақланиш ҳам қалбга даво бўлади.
Аллоҳнинг Китобини ёд олиш ва оятлар билан қалбингизни тўлдиришга ошиқинг. Амри маъруф, наҳйи мункар ва ҳақ гапни айтиш билан Аллоҳнинг сўзини олий қилишга интилинг. Кечалари кўп намоз ўқинг, чунки бу солиҳлар амалидир. Шунда саломатлигингиз яхшиланаётганини сезасиз ва Қуръон оятларини ўқиш ҳақиқатда қалб касалликлари учун даво эканини аниқ кўрасиз.
Абу Саъид Худрий розияллоҳу анҳу ривоят қилади: Расулуллоҳ соллаллоҳу алайҳи ва салламнинг ҳузурларига бир киши келиб юраги оғришидан шикоят қилди. Расулуллоҳ соллаллоҳу алайҳи ва саллам унга: “Қуръон ўқи” дедилар (Ибн Мардавайҳ).
Юракни бақувват ва хотиржам қиладиган бошқа даво усуллари:
- Уйқудан олдин ўнг қўлни қалб устига қўйган ҳолда Ғофир сурасини ўқиш;
- Шарҳ сурасини ва ушбу оятни 3 марта ўқиш: “Эй одамлар! Сизларга Раббингиздан ваъз (насиҳат), диллардаги нарса (ширк ва бошқа иллатлар)га шифо ва мўминларга ҳидоят ва раҳмат келди” (Юнус сураси, 57-оят).
- Абу Жаъфар Муҳаммад ибн Али розияллоҳу анҳудан ривоят қилинади: “Қалбида бирор нохушликни сезган одам “Ёсин” сурасини бир идишга заъфарон ва сув билан ёзиб ичсин” (Имом Қуртубий ва Имом Ҳоким).
- Саҳар пайтида етти дона хурмога (Мадина хурмоси бўлса, яна яхши) Фотиҳа сурасини етти марта ўқиб, дам уриш ва “Бисмиллаҳ”ни айтиб, шифо ва барака тилаб ейиш;
- Уч нарса: исроф, кўп ухлаш ва Аллоҳ зикридан ғофил бўлишдан сақланиш лозим. Зеро, бедорлик, Аллоҳни кўп зикр қилиш туфайли қалб таскин топади. Аллоҳ бундай дейди: “Огоҳ бўлингизки, Аллоҳни зикр этиш билан қалблар ором олур (ва таскин топур)” (Раъд сураси, 28-оят).
Раҳматуллоҳ ОБИДОВнинг “Аллоҳнинг гўзал исмлари ва Исми Аъзам” китоби
асосида тайёрланди.
“Ҳидоят” журналининг 2019 йил, 3-сонидан