Хорижлик мутахассислар қайси давлатларда ишлашни хоҳлайди?
Хорижлик мутахассислар ишлаш учун маъқул кўрадиган давлатлар орасида Канада биринчи ўринда турибди. Ундан кейин АҚШ, Австралия ва Германия бор.
Boston Consulting Group (BCG) консалтинг компанияси, ишчи-ходимлар қидириш билан шуғулланадиган The Network тармоғи ва Stepstone портали ўтказган тадқиқот натижалари ана шуни кўрсатди. Тадқиқотда 190 мамлакатдан 208 минг мутахассис қатнашди ва улардан ишлаш учун қайси давлатларга боришни исташлари сўралди.
Маълум бўлишича, хорижлик мутахассисларнинг Осиё-Тинч океани давлатлари, хусусан, Сингапур, Япония ва Янги Зеландияда ишлашга қизиқиши ортган. Бунинг асосий сабабларидан бири мазкур мамлакатларнинг коронавирус пандемияси ўчоғидан узоқда жойлашганидир. Айнан пандемия сабабли Италия, Франция ва Испанияга қизиқиш камайган.
Лондон, Амстердам ва Дубайни хорижлик мутахассислар энг жозибадор шаҳарлар сифатида эътироф этган. Шунингдек, улар маъқул кўрадиган шаҳарлар ўнталигида Абу-Даби, Токио, Сингапур, Нью-Йорк, Барселона ва Сидней ҳам бор.
Чет эллик мутахассисларнинг танлови уларнинг малака даражасига боғлиқлигини ҳам унутмаслик керак. Масалан, магистр дипломига ва илмий даражага эга мутахассислар биринчи навбатда Лондонни, ундан кейин эса Берлинни танлаган.