Мақолалар

Ҳали катта бўласан, болам

Чоп этилди Aprel 30, 2019 Ҳали катта бўласан, боламda fikr bildirishni o'chirish

 

Қачон катта бўламан, дейсан,

Кулча нонни ўтириб ейсан,

Катта эрур яралган олам,

Ҳали катта бўласан, болам.

 

Читтани ол, Рамазонни айт,

Ҳар бир уйга юзлангин-да, қайт.

Шеърлар ўқи, эртаклару байт,

Ҳали катта бўласан, болам.

 

Сен ўқигин, билиминг ошир,

Бўш келмагин, бўласан ботир.

Варақлагин китоб, асотир,

Ҳали катта бўласан, болам.

 

Хонадонинг қўриқчиси бўл,

Боғлар ярат – мевалари мўл.

Меҳнат билан ўссин оёқ, қўл,

Ҳали катта бўласан, болам.

 

Алла айтган онангдир бахтинг,

Сен шунчаки катта бўлмадинг,

Дуо олсанг, оқдир йўлларинг,

Ҳали катта бўласан, болам.

 

Сен отангнинг киргин ёнига,

Оро бўлгин жисму жонига,

Шукр қилгин унинг борига,

Ҳали катта бўласан, болам.

 

Нима дейман, сен катта  бўлгин,

Истакка ет, мақсадга тўйгин,

Сен сўрадинг, мен айтдим-қўйдим,

Ҳали катта бўласан, болам.

 

Одил ИСАБОЕВ

Фарғона вилояти Риштон тумани