Чалғитмасин
Тиғиз келса-да вақтимиз,
Ибодатдир нақдимиз.
Қаноатда бахтимиз,
Чалғитмасин Ўзидан.
Тавбаси билан инсон
Пок бўлар, шунга ишон.
Дилга оралатиб шайтон, –
Чалғитмасин Ўзидан.
Йўқдан бизни бор этиб,
Риёзатни ёр этиб,
Ҳаққа келганда етиб,
Чалғитмасин Ўзидан.
Юрсам ҳамки пиёда,
Кунлар кундан зиёда.
Бир зумга ҳам дунёда
Чалғитмасин Ўзидан.
* * *
“Икки дунё йўлдоши имон,
Ўткинчи туш кабидур жаҳон”, –
Дея ишқда этиб мен фиғон,
Катта йўлга чиқдим, Худойим.
Бойлик, обрў, нон истаб эмас,
Фақирликдан қўрққанимданмас,
Розилигинг этиб мен ҳавас,
Катта йўлга чиқдим, Худойим.
Ўзинг – Раҳим, Ўзинг – дўст, паноҳ,
Фақат Ўзинг ишқимга гувоҳ.
Ғофилликни билиб мен гуноҳ,
Катта йўлга чиқдим, Худойим.
Сенга муҳтож Жума Сулаймон,
Қўлламасанг, аҳволим ёмон,
Ишқсизликдин бўлай деб омон,
Катта йўлга чиқдим, Худойим.
Жума СУЛАЙМОН