Бизларга Исломнинг марҳамати кенг
Сабрдир бош мезон Рамазон ойи,
Зийнатланди инсон хулқи, чиройи.
Исломга эргашган барча фидойи,
Рамазон муборак сизларга, халқим.
–
Нафсни жиловлаб олдик шубҳасиз,
Ишқий эҳтиросга берилмаймиз биз.
Ниятлар эврилмас сира Аллоҳсиз,
Рамазон муборак сизларга, халқим.
–
Бизларни қийнамас иссиқ тафти ҳам,
Аъзолар олмоқда кундузлари дам,
Ифторда томоқлар бир оз олур нам,
Рамазон муборак сизларга, халқим.
–
Яхши сўз, тилаклар бизларга ҳамдам,
Қалблардан жой олди қайноқ меҳр ҳам,
Бугунги замонда ҳеч ким эмас кам,
Рамазон муборак сизларга, халқим.
–
Араз ва гиналар бўлдики унут,
Дилларга жо бўлди дуойи Қунут.
Ижобат бўлмоқда орзу ва умид,
Рамазон муборак сизларга, халқим.
–
Тотувлик, аҳиллик кундалик шиор,
Меҳнатдан топмоқда миллат ифтихор,
Обод бўлаётир биз севган диёр,
Рамазон муборак сизларга, халқим.
–
Таровеҳ намозин масжидда ўқинг,
Қуръон оятларин мағзини чақинг.
Бизларга Исломнинг марҳамати кенг,
Рамазон муборак сизларга, халқим.
Абдисаттор МЎМИНОВ,
Қашқадарё вилояти Яккабоғ тумани