Сабрни улуғловчи мақоллар
Азобга бардош керак,
Ҳамиша йўлдош керак.
***
Бардошлига ёғлик ош,
Сабрсизга ош ҳам тош.
***
Бесабрнинг нафси шошар,
Тусагани кузда пишар.
***
Бир аччиқнинг бир чучуги бор.
***
Бола шошар,
Тут вақтида пишар.
***
Болта бўлсанг, ур,
Кунда бўлсанг, чида.
***
Борига рози бўл,
Йўғига сабр қил.
***
Жаҳл – жонингга жабр.
Жаҳл душмани – сабр.
***
Камоли имон – сабр.
***
Кашта қиммат, сабр арзон.
***
Одоб билан бахт топилар,
Сабр билан – тахт топилар.
***
Очиққан ўлмас, ошиққан ўлар.
***
Ошиқмаган овчи ҳумо овлар.
***
Ошиқмаган олисга етар.
***
Поклик соғлиқни, ақл сабрни сақлар.
***
Сабр – аччиқ, меваси – ширин.
***
Сабр билан меҳнат қилган бой бўлар.
***
Сабр билан хор гулистон бўлар,
Шўр замин боғ билан бўстон бўлар.
***
Сабр сўнгги – сўм олтин.
***
Сабр – ютуқ калити.
***
Сабр таги – раҳмон,
Шошган иши – шайтон.
***
Сабр таги – сари олтин,
***
Сабр билан чиқар отинг.
***
Сабр тоғни йиқитар.
***
Сабр – умр хазинаси.
***
Сабр – шодлик калити.
***
Сабр этган етар муродга,
Бесабрлар қолар уятга.
***
Сабр этган – муродга етган.
***
Сабр қилган мой ошар,
Олқиш олган кўп яшар.
***
Сабр қилсанг, туянинг юкини бўта кўтарар.
***
Сабр қилсанг, ғўрадан ҳолва битар,
Бесабрлар ўз оёғидан йитар.
***
Сабрли бўлсанг, ўзарсан,
Сабрсиз бўлсанг, тўзарсан.
***
Сабрли кишининг иши соз.
***
Сабрли минг яшар,
Сабрсиз оз яшар.
***
Сабрли чидар,
Сабрсиз ёнар.
***
Сабрлининг бошига олма битар,
Сабрсизнинг бошига – ғавғо.
***
Салобатли бўлма, саботли бўл.
***
Сирот кечмай, қаҳ-қаҳ урма.
***
Совун кирни очар,
Сабрсиз – сирни.
***
Тоқат қилсанг, тоғ эгилар,
Сабр қилсанг, боғ эгилар.
***
Тоқатлига тоғлар эгар бошини,
Бетоқатнинг итлар еяр лошини.
Муҳаммад Зоҳид ҚЎТҚУнинг “Сабр” китобидан
Асар “Мовароуннаҳр” нашриётида чоп этилган.
Нашриётдан харид нархи 5000 сўм