Ўзбекистон янгиликлари

Олий Мажлис Қонунчилик палатасида ҳам карантин эълон қилинди

Чоп этилди Mart 18, 2020 Олий Мажлис Қонунчилик палатасида ҳам карантин эълон қилиндиda fikr bildirishni o'chirish

Ўзбекистон парламенти қуйи палатасида ҳам 16 мартдан бошлаб карантин қоидалари амал қила бошлади. Ҳукумат белгилаган чора-тадбирлардан келиб чиқиб, палата қўмиталарининг мажлислари, фракциялар йиғилишлари, ялпи мажлислар ўтказилиши тўхтатилди. Бу ҳақда депутат Дониёр Ғаниевга асосланиб, «Kun.uz» хабар берди.

 

Депутатнинг айтишича, Олий Мажлис биносига киришда тиббий текширувлар йўлга қўйилган. Бундан ташқари, шахсий гигиена қоидаларига қатъий амал қилиш учун шароитлар яратилган.

«Давлат ҳокимиятининг бирдан бир манбайи бу халқимиз эканидан келиб чиқсак, давлат халқ манфаатларини кўзлаб, биринчи навбатда, унинг соғлиғи ва хавфсизлигини таъминлаш учун хизмат қилиши лозим. Шу нуқтаи назардан, коронавирус инфекциясининг республикамизда тарқалишига қарши кураш бўйича ҳукумат томонидан қаттиққўллик билан кўрилаётган барча карантин чора-тадбирларини мен ҳам депутат сифатида, ҳам бир фуқаро сифатида тўлалигича қўллаб-қавватлайман.

Зеро, коронавирусга қарши кураш бўйича Хитой ва Европа давлатлари тажрибасидан келиб чиқиб, хулоса қиладиган бўлсак, карантин қоидаларига қатъий амал қилиш ҳозирча бу инфекцияга қарши курашишнинг энг самарали йўли ҳисобланади.

Карантин муносабати билан қатъий чоралар кўрилаётгани парламент қуйи палатаси фаолиятини тўхтатди, дегани эмас. Ҳозирда парламентда ички электрон тизим йўлга қўйилган бўлиб, барча ҳужжатларнинг электрон алмашинуви учун шароитлар яратилган. Парламент ва депутатларнинг асосий фаолияти электрон тарзда давом эттирилади», — дейди у.

Дониёр Ғаниевга кўра, қонун лойиҳалари муҳокамалари, ижро ҳокимияти томонидан қонунлар ижроси назорати, фуқаролар мурожаатларини қабул қилиш ва улар устида ишлаш ҳам электрон тарзда амалга оширилади.

«Парламент ва ҳукумат ўртасидаги алоқалар ва ҳужжатлар алмашинуви электрон ҳукумат портали орқали ўрнатилса, депутатларимизнинг фуқаролар билан алоқаси эса уларнинг ижтимоий тармоқлар (Facebook ва Telegram)даги шахсий саҳифалари орқали давом этади.

Қолаверса, мамлакатимизда карантин ҳафталигининг жорий этилиши баҳонасида, эҳтимол, оғриқли нуқталаримиздан бири бўлган ‘Электрон Ҳукумат’, ‘Электрон Парламент’ ҳамда масофавий таълим тизимларини янада ривожлантириш, уларнинг амалда қўлланилишини тезлаштириш, шунингдек, ҳудудларни тезкор ва сифатли интернет алоқаси билан таъминлаш ишларини жадаллаштиришга катта бир туртки бўлар. Зеро, ҳар бир қийинчилик ёки хавф инсонларни янги имкониятлар ‘ойнасини’ излашга ундайди», — дейди депутат Дониёр Ғаниев.

Олий Мажлис Қонунчилик палатаси ахборот хизмати раҳбари Ҳожиакбар Тўлаганов парламент фаолиятини тўхтатмаслигини маълум қилиган.

«Қонун лойиҳаларига масъуллар шу ерда қолади, қолганлар жойларда коронавирус сабабли парламент назоратини ўрнатиш мақсадида ўз сайлов округларида фаолият олиб боради.

Дониёр Ғаниевнинг гапида жон бор. Гап шундаки, қонун лойиҳаларини иккинчи, учинчи ўқишга тайёрлаш жараёнига мутахассислар жалб этилади. Эндиликда улар билан мессенжерлар, электрон почта орқали мулоқотда бўлиб турилади», — деган у.

Эслатиб ўтамиз, Ўзбекистонда коронавирус билан касалланиш ҳолатлари аниқлангани сабабли 16 мартдан барча таълим муассасалари карантин учун ёпилди ҳамда бошқа ташкилотларда санитар-гигиеник чоралар кучайтирилди.