Слайдер

Шавкат Мирзиёев: “Кўчага чиқиши мумкин эмас”

Чоп этилди Mart 20, 2020 Шавкат Мирзиёев: “Кўчага чиқиши мумкин эмас”da fikr bildirishni o'chirish

Ўзбекистон Республикаси Президенти Шавкат Мирзиёев 19 март куни ўтказилган коронавирус пандемиясининг аҳоли турмуш даражаси ва иқтисодиёт тармоқларига салбий таъсирини юмшатиш масалаларига бағишланган видеоселектор йиғилишида одамларга карантин даврида кўчага чиқмасликни буюрди.

“Кечаги ва бугунги видеоселекторда коронавирус пандемияси тарқалишининг олдини олиш бўйича қандай ишлаш нуқтаи-назаридан ҳамма чораларни айтдик. Энди тармоқлар бўйича иқтисодиётимизда нималар қилишимиз керак? Пандемия инсонлар саломатлиги билан бирга, албатта, иқтисодиёт тармоқларига ҳам таъсирини кўрсатмоқда. Шунинг учун бугунги шароитда қандай ишлаш кераклиги нуқтаи-назаридан аниқ вазифаларни келишиб олишимиз керак.

Чегараларни ҳаммасини ёпдик. Кечаги айтган ҳамма тавсияларни, берган топшириқларни вақтида бажариш керак. Битта нарсани билишинглар керак-ки, “манга таъсир қилмайди, манга тегишли эмас”, деган раҳбар, фуқаро, тадбиркор, ишбилармон, умуман, нуронийларимиз, оқсоқолларимиз ва ёшларимиз хато қилади. Ҳаммамизга боғлиқ бу нарса. Ўзимизга боғлиқ.

Ҳаммага таъсир қилади. Агар кимда-ким касаллигини яшириб уйда ўтирса, у ўзига эмас, мана шу Ўзбекистонимизга, халқимизга хавф-хатар етказаётган омил бўлади. Бу бўйича жиноий жавобгарлик бор. Энди ташқаридан келиши мумкин эмас, бу хавф-хатар, ҳамма ер ёпилди. Фақат ичкаридаги касалланганларни ўз вақтида аниқласак ва профилактика ишларини, мен айтгандек, ойнаи-жаҳон, рўзнамоларда ҳар куни олимларимиз, мутахассисларимиз чиқиб, нима қилиш кераклиги бўйича аниқ-аниқ ҳамма нарсани тушунтириб беряпти. Телефонларимиз бор, сайтларда чиқараяпмиз. ҳамма буни билиши керак.

Ҳар бир ҳоким битта нарсани билинглар – “бу мани вилоятимга келмади”, “бу бизнинг вилоятда йўқ, бизнинг туманимиз тинч”, деб бемалол юришларинг у хиёнат. Такрор-такрор айтаман, ҳамма профилактик ишларни, айтилган чора-тадбирларни ҳамма ўз вақтида бажариши керак.

Кўп одамларимиз карантинни тушунмасдан, уйида ўтирганлар кўчага чиқиб кетяпти. Чиқиши ман этилади уни. Юриши ҳам ман этилади. Нимага десангиз у мана шу касалликни тарқатувчи ҳисобланади. Марказлашган жойларни қилиш осон, лекин кўп жойларда биздаги маълумотлар бўйича марказлашган жойлардан ҳам кимдир чиқяпти. Ман этилади.

Жипслашиб, ҳаммамиз бир бўлиб, айтилган гапларни қилиб, шифокорларнинг тавсияларини тўғри амалга оширсак, ҳамма масалалар жой-жойида бўлади. Мана, Худонинг ўзи ҳам ёрдам бериб, кундан-кун исияпти, ҳар куни 2-3 даражага. Эртага, мана, 25, эртадан кейин 26 бўляпти. Бу бизга жуда катта мадад бўляпти.

Бир таҳлил қилинглар, дунё савдоси тўхтади ҳаммаси. Лекин ҳаёт давом этяпти. Биз мана шундай оғир пайтда ўзимиз ҳамма нарсани қўлга олиб, раҳбар бўлган одам – ташкилотнинг раҳбари, корхонанинг раҳбари, қўшма корхонанинг раҳбари, тадбиркорлар – ҳаммаси ҳозирги воқеаларга бефарқ бўлмаса, Худо хоҳласа, бундан чиқиб кетамиз. Мен бугун катта фармонга қўл қўйдим. Инқирозга қарши жамғарма тузилди. Ҳамда ушбу жамғармага 10 трлн. сўм ажратилмоқда. Ҳар бир вилоятни, ҳар бир тармоқни бу 10 трлн. сўмни ичида ўзининг улуши бор”, дейди Президент Шавкат Мирзиёев.

Эслатиб ўтамиз, Ўзбекистонда коронавирус билан боғлиқ илк ҳолат жорий йилнинг 15 март куни қайд этилган эди. Айни вақтда беморлар 23 нафарни ташкил этмоқда. Мамлакат бўйлаб 16 минг киши карантинга олинган.