Мақолалар

Қиролнинг боши қотди…

Чоп этилди Fevral 2, 2021 Қиролнинг боши қотди…da fikr bildirishni o'chirish

Телевизорда эртаю кеч бир дорини реклама қилишяпти. Эҳтимол, радиода ҳам айланаётгандир ўша реклама, радиоприёмнигим йўқлиги боис радио эшитмайман. Экранда бир қизча ва отаси кўринади-да кадр ортидаги овоз: “Маликанинг бир муҳим мусобақадан олдин иситмаси чиққан эди, қирол қизидан жуда хавотирда эди. Шунда эзгулик фариштаси келди ва уни қандай даволашни билар эди”, дейди. Экранда ёқимли аёл пайдо бўлади, кейин қўлидаги дорини баландга кўтаради. Кадр ортидан овоз эшитилади: “Ацеклофенак…”

Нима бўпти? Рекламада…

Ҳа, шундай. Реклама. Бироқ бу рекламада йўл қўйилган хато бандалар яратган луғатлардаги сўзлардаги ҳарфий хатолар эмас, ақидавий хато. Аёл киши “эзгулик фариштаси” деб айтиляпти.

Ана шу “эзгулик фариштаси” деган жумла Аллоҳ таолонинг қанчалар ғазабини келтиришини Қуръони каримни ўқиганлар билади. Бу ўринда эса гапимиз чўзилиб кетмаслиги учун Каломи шарифдан иккитагина мисол келтириш билан кифояланамиз. Жумладан, Нажм сурасининг 27-оятида:

إِنَّ الَّذِينَ لَا يُؤْمِنُونَ بِالْآخِرَةِ لَيُسَمُّونَ الْمَلَائِكَةَ تَسْمِيَةَ الْأُنثَى۝

Албатта, охиратга иймон келтирмаганлар фаришталарни аёл номи билан номларлар”.

Ўтмишда араб мушриклари фаришталарни аёл деб эътиқод қилгани минглаб манбаларда айтиб ўтилган.

Демак, ушбу реклама реклама ролигини тайёрлаганлар араб мушрикларининг ғоясини тарғиб қиляпти. Энди давомига диққат қилинг:

وَجَعَلُوا الْمَلَائِكَةَ الَّذِينَ هُمْ عِبَادُ الرَّحْمَنِ إِنَاثًا أَشَهِدُوا خَلْقَهُمْ سَتُكْتَبُ شَهَادَتُهُمْ وَيُسْأَلُونَ۝

Роҳманнинг бандалари бўлмиш фаришталарни аёллар ҳисобладилар. Ёки уларнинг яратилишига гувоҳ бўлдиларми?! Албатта, бу гувоҳликлари ёзилур ва сўроққа тутилурлар!(Зухруф сураси, 19-оят).

Азизлар, Аллоҳнинг фаришталарини аёл деб ҳисоблаганингиз ҳисоб дафтарингизга ёзиб қўйилади ва Қиёматда айнан шунинг учун сўроққа тортиласиз.

Анбиё сурасида фаришталарнинг Аллоҳ таолонинг қизлари эмас, балки икром этилган итоатли ва одобли бандалари экани айтилган. Фаришталар инсон жинсидан бўлмагани боис уларда эркаклик ва аёллик хусусияти йўқ. Ҳаётда эса фаришталар инсонларнинг кўзига ҳар доим эркак киши қиёфасида кўринган. Масалан, Ер юзига тушган Ҳорут ва Морут эркак қиёфасида бўлган. Иброҳим алайҳиссаломнинг меҳмони бўлиб Лут алайҳиссаломнинг қавмига балони олиб келган фаришталар мўйлаби сабза урган ёш йигитлар кўринишида бўлган. Жаброил алайҳиссалом Биби Марямга эркак киши қиёфасида кўринган. Шунингдек, у зот Пайғамбаримиз соллаллоҳу алайҳи ва саллам ҳузурига инсонларга ўхшаб келган чоғида баъзан Диҳятул Калбий розияллоҳу анҳу, баъзан эса ҳеч ким танимайдиган инсон қиёфасида келган.

Ана шу каби мисолларни ўқиганингиздан кейин ҳам бу одамлар эски араб мушрикларининг одатини қаердан ўзлаштириб олди экан, деб ҳайрон бўлмайсизми?

Хуллас, фаришталар Аллоҳнинг амри билан инсонларга фақат эркак киши қиёфасида кўринган. Аёл сиймосида кўрингани бирорта исломий манбада учрамайди. Шундай экан, битта таблеткани реклама қилиб уч-тўрт сўм ишлаб оламан, деб гуноҳга ботиб қолманг. Илло, сизнинг телевизорда чиқиб қилаётган бу қилмишингиз фақат ўзингизнинг гуноҳингиз бўлиши билан чекланиб қолмайди. Балки сиз бу ишингиз билан бошқаларни, хусусан, ёшларни ҳам тўғри йўлдан чалғитасиз ва уларнинг ҳам гуноҳини бўйнингизга олиб қўясиз. Сўроғи эса Аллоҳ таоло ваъда қилганидек жуда ҳам қаттиқ бўлади.

 

Дамин ЖУМАҚУЛ