“Мен уларданманми?”
Пайғамбар алайҳиссаломнинг завжаи мутаҳораларидан Умму Салама розияллоҳу анҳодан ўрганганимизга кўра:
Дастлабки мусулмонлардан бўлган Абдурраҳмон ибн Авф бир куни унинг ёнига борди ва:
– Онажон! Қурайш халқининг энг бадавлати менман. Далаларимдан бирини қирқ минг дирҳамга сотдим. Бунчалик кўп мол-давлатга соҳиб бўлмоғим мени маҳв этишидан қўрқа бошладим, – деди.
Умму Салама онамиз унга бундай деди:
– Ўғлим, молингни эҳтиёж соҳибларига мўл-мўл тарқатишингни тавсия қиламан. Чунки Расули акром соллаллоҳу алайҳи ва салламнинг: “Мен ораларидан айрилганимдан сўнгра баъзи саҳобаларим мени асло кўра олмаслар”, деганларини эшитган эдим.
Буни эшитган Абдурраҳмон ибн Авф қаттиқ даҳшатга тушди. У ердан чиқиб тўғри ҳазрати Умарнинг олдига борди ва унга Умму Салама онамиздан эшитганларини гапириб берди.
Ҳазрати Умар буни эшитар-эшитмас, Умму Салама онамизнинг зиёратига югуриб борди ва унга:
– Аллоҳ ризоси учун менга айтинг, Пайғамбар алайҳиссаломни кўрмайдиганлар орасида мен ҳам борманми? – деб сўради.
Умму Салама онамиз унга бундай жавоб берди:
– Йўқ, сиз улардан эмассиз. Бироқ сиздан кейин ҳеч бир кимсанинг бу мавзудаги саволига жавоб бермайман, – деди[1].
Профессор, доктор Меҳмет Яшар КАНДЕМИРнинг “Саҳобадан 101 хотира” китобидан
Таржимон: Дамин ЖУМАҚУЛ
[1] Аҳмад ибн Ҳанбал, Муснад, VI, 290, 298,307, 312, 317; Абу Яъло ал-Мавсилий, Муснад, XII, 436; Табароний, ал-Мужмаъил-кабир (Салафий), XXIII, 394; Ҳайсамий, Мажмауз-завоид, IX, 72