Грецияда ёнғинларни намойиш қилаётган журналистларга ҳужум уюштирилди
Грециянинг OPEN TV телеканали журналистлари Аттакида авж олаётган ўрмон ёнғинларини намойиш қилаётганда номаълум шахслар ҳужумига учраган.
“Полициячилар шу яқин орада эди, лекин улар воқеага аралашмади”, деди журналистлар.
Ҳозирда Грециянинг барча телеканаллари мамлакатда назорат остидан чиқиб кетган ўрмон ёнғинларидан тўғридан-тўғри репортажлар олиб бормоқда.
OPEN TV гуруҳи шанба кунига ўтар кечаси Аттиканинг шимолида Фракомакедонос туманида авж олаётган ёнғин ўчоқларидан тўғридан-тўғри репортаж олиб бораётган чоғда уларга нисбатан ҳужум уюштирилган.
Ҳужум билан боғлиқ воқеа бошланганда тўғридан-тўғри эфирда намойиш қилинган, кейин эса алоқа узилиб қолган.
Ҳужумга учраган мухбир Элефтерия Спиракининг сўзлаб беришича, 15 кишидан иборат ёш йигитлар журналистлар гуруҳини ўраб олган ва автомобиль ойнасини синдириб, журналистларга ташланган, уларни ҳақорат қилишган ҳамда шахсий буюмлари ва пулларини ўғирлаган.
Худди шу пайтда яқин атрофда тўртта полициячи бўлган. Улар воқеани кўриб турганди, лекин аралашмади, дейишмоқда журналистлар.