Истиқлолнинг 35 йиллигига 35 та факт – 33. Ўзбекистондаги Ислом цивилизацияси марказининг барпо этилиши ва фаолияти
Ўзбекистондаги Ислом цивилизацияси марказининг ташкил этилиши мамлакатнинг мустақиллик йилларидаги йирик илмий-маърифий лойиҳаларидан бири ҳисобланади. Марказни барпо этиш ғояси 2017 йилда илгари сурилиб, 2018 йил 15 июнда унинг пойдеворига тамал тоши қўйилди. Тошкент шаҳридаги Ҳазрати Имом мажмуаси ҳудудида 10 гектар майдонда қурилган марказ 2026 йил 17 март куни расман очилди. Марказда Қуръони карим зали, 8 минг квадрат метрдан зиёд кўргазма майдонига эга музей, 550 ўринли анжуманлар зали, кутубхона, қўлёзмалар ва электрон адабиётлар фонди ҳамда илмий фаолият учун махсус хоналар ташкил этилган. Унинг экспозицияларида Ўзбекистон заминидан етишиб чиққан буюк алломаларнинг жаҳон илм-фани ва ислом цивилизацияси ривожига қўшган ҳиссаси замонавий технологиялар асосида намойиш этилмоқда. Марказ қисқа вақт ичида йирик маърифий масканга айланиб, 2026 йил 1 июнь ҳолатига қадар ярим миллион нафар маҳаллий ва хорижий ташриф буюрувчини қабул қилди.