Озарбайжонда яна 2 ҳафтага карантин кучайтирилди
Мамлакатда коронавирусга чалинганлар сони кўпаяётгани сабабли ҳукумат 21 июндан 5 июлгача пойтахт Боку, Ганжа, Сумгаит, Ленкоран, Евлах, Масалли, Жалилобод каби йирик шаҳарлар ва Бокуга ёндош Апшерон туманида карантин шароитлари қатъийлаштирилади. Бу ҳудудларнинг барчаси кўп сонда касалланганлар қайд қилинган биринчи кластерга киради.
Ҳукумат қарорига кўра, бу вақт давомида дўконлар ва дорихоналардан ташқари, йирик савдо марказлари яна ёпилади. Музейлар ва кўргазма заллари, сартарошхоналар ва гўзаллик салонлари ишлашдан тўхтайди. Шу билан бирга, ветеринар клиникалар, ҳаётни таъминлаш хизматлари, жамоат транспорт, жумладан, метро ишлашда давом этади.
Давлат корхоналари ва бюджет ташкилотлари ҳамда карантин вақтида фаолиятини давом эттиришга рухсат берилган соҳаларда ишловчи хусусий компаниялар ходимларининг бир қисми масофадан ишлашга ўтказилади.
Бошқа фуқароларга 5 апрелдан 18 майгача амал қилган, уйни тарк этиш учун СМС рухсат олиш тизими яна жорий қилинади. Фуқаролар яшаш жойларини фақат уч ҳолатдагина тарк этишлари мумкин бўлади: тиббий маълумотнома олиш учун; озиқ-овқат маҳсулотлари ва дори-дармон харид қилиш, почта ёки банкка бориш ҳамда сайр қилиш учун; яқин қариндошлари дафн маросимида иштирок этиш учун.
Карантинга риоя қилинишини назорат қилиш ички ишлар вазирлигига юкланган.
Эслатиб ўтамиз, Озарбайжонда 24 мартдан алоҳида карантин режими киритилган бўлиб, у 18 июнда 1 августга қадар узайтирилди. Бу қарор мамлакатда чекловлар юмшатилиши сабабли эпидемиологик вазият ёмонлашгани туфайли қабул қилинган.
Озарбайжонда 19 июнда янги касалланиш ҳолатлари 400тадан ошиб, 20 июнда эса пандемия давомидаги энг кўп кунлик касалланиш ҳолати қайд қилиниб, 471 тани ташкил қилган.
Охирги маълумотларга кўра, мамлакатда коронавирусга чалинганлар сони 12 мингдан кўпроқни, ундан вафот этганлар сони 148 нафарни, соғайганлар эса 6516 нафарни ташкил қилмоқда.