Ўзбекистон янгиликлари

Эски Термизнинг хавфсизлик қальаси ҳақида эшитганмисиз?

Чоп этилди Dekabr 5, 2020 Эски Термизнинг хавфсизлик қальаси ҳақида эшитганмисиз?da fikr bildirishni o'chirish

Сурхондарё вилоятининг Амударё бўйида қадимги иншоотнинг катта-кичик қолдиқлари сақланиб қолган. Археолог олимларнинг айтишича, бино эски Термизнинг таркибий қисми бўлиб, ўтмишда ишончли истеҳком вазифасини бажарган Чингизтепа қальасидир. У милоддан аввалги 1 асрда бунёд этилган.

–Чингизтепа мудофаа тизими “Катта юэчжилар” Юнон-Бақтрия давлатини тўлиқ эгаллаб, Бақтрия ҳудуди шу жумладан, қадимги Термизда ўтроқлашгач, барпо этилгани фанда ўз исботини топган, – дейди вилоят туризмни ривожлантириш ҳудудий бошқармаси бошлиғи ўринбосари, ёш археолог З. Алимардонова.– Воҳада археологик тадқиқот ишларини олиб борган кўплаб қадимшунослар, шунингдек, “Ўзбек-Француз-Бақтрия” илмий экспедицияси ҳам қальани қазиб, бир замонлар унинг хавфсизлик мудофаа қўрғони бўлганини аниқлаган.

Ўтмишда қадимги Термиз дунё савдогарлари серқатнов бўлган ҳудуд сифатида ҳам машҳур бўлган. Бу ерда савдо, маданият, ҳунармандчилик, қурилиш ва бошқа соҳалар кенг ривожланган. Шундоққина дарё бўйида қад ростлаб турган Чингизтепа жанубдан Пайғамбар ороли орқали Жайҳун (Амударё)дан кечиб, Термизга келаётган ёки шимолий юртлардан бу шаҳар орқали Бақтр (Балх) ва бошқа юртларга йўл олган савдо карвонларининг доимий ҳавфсизлигини таъминлаб турган мустаҳкам истеҳком вазифасини бажарган.

Мутахассислар жаҳон олимларида катта қизиқиш ўйғотиб келаётган мазкур археологик ёдгорликнинг ўтмишдаги қиёфасининг асл кўринишини қайта жонлантирган. Бу ердан топилаётган турли асори-атиқалар музейлар томошабинларида бой таассурот ўйғотаётир. Ёдгорлик қадимги шаҳарнинг айниқса, Кушон даврига оид мудофаа тизими шаклланиши ва тараққиёт босқичларини ўрганишда муҳим манба бўлиб хизмат қилмоқда.