Франция: черковдаги педофилия қурбонлари сони эълон қилинди
Франция католик черковларида жинсий зўравонлик ҳолатларини ўрганган мустақил комиссия хулосасига кўра, черковларда охирги етмиш йил ичида 216 мингга яқин болалар ва ўсмирлар ана шундай жирканч жиноятнинг қурбони бўлган.
Таркибида ҳуқуқшунослар, шифокорлар, тарихчилар ва диншунослардан иборат комиссиянинг ҳисоботи бугун эълон қилинди. Жинсий зўравонликлар руҳонийлар, роҳиблар ва черковга алоқадор бошқа кишилар томонидан амалга оширилган. Жиноятлардан учдан икки қисмига айнан руҳонийлар айбдор деб ҳисобланмоқда. Комиссияга кўра, жинсий зўравонликларга тахминан 2900-3200 киши қўл урган.
Комиссия раиси Жан-Марк Совенинг айтишича, агар католик черкови ташкил этган ва бошқарган муассасалардаги жиноятлар ҳам эътиборга олинса, педофилия қурбонларнинг сони 330 мингга етиши мумкин.
Мустақил комиссия ушбу ҳисобот устида 2,5 йил иш олиб борди. Черков, суд ва полиция архивлари, ОАВ хабарлари ўрганиб чиқилди. Шунингдек, қурбонлар билан суҳбатлар ўтказилди.