Каъба
Кунларнинг бирида Аллоҳ таоло Иброҳим алайҳиссаломнинг кўнглига ёлғиз Ўзига ибодат қилинадиган бир уй қуриш истагини солди. Зотан, шаҳарда уйлар кўп, лекин Аллоҳга ибодат қилинадиган байт йўқ эди. Ўғли Исмоил иккови тоғдан тош ташиб, Каъбани бунёд этишга киришди. Улар меҳнат ва машаққат ила Каъбани қуришар, Аллоҳ таолони зикр этар ва У Зотга дуо қилишдан тўхтамасдилар: “Раббимиз, биздан қабул эт, албатта, Сенинг Ўзинг эшитувчи, билувчи Зотсан” (Бақара сураси, 127-оят).
Аллоҳ таоло Иброҳим алайҳиссалом ва Исмоилнинг дуоларини қабул этиб, Каъбани баракотли қилди. Шундан сўнг мусулмонлар ҳар намозда унга юзланиб, ибодат қилдилар, тавоф қилиш учун ошиқдилар. Бугун ҳам бутун дунё мусулмонлари Каъба томон интиладилар, у ерда намоз ўқишни, Аллоҳ таолога ибодат қилишни энг улуғ орзу ва савобли амал деб биладилар. Аслида буларнинг барчаси Иброҳим алайҳиссалом ва ўғли Исмоилнинг Яратган Зотга қилган дуолари ижобатидир.
Шу боис ҳам мўмин киши Иброҳим алайҳиссаломга, ўғли Исмоилга ҳамда суюкли пайғамбаримиз Муҳаммад соллаллоҳу алайҳи ва салламга Аллоҳ таолонинг салавоти ва саломларини йўллаб туришлари лозим.
“Ислом нури”газетасининг 2024 йил 1-сонидан
http://hidoyatuz.taplink.ws