“Мирхалил ҳожи ота” жомеси
Тошкент туманининг Қизғалдоқ қишлоғида қур тўкиб турган “Мирхалил ҳожи ота” масжиди – инсон қалбидаги иймон ва ихлосга бўлган эҳтиёжни эслатиб турадиган қутлуғ маскан. Бу ерга қадам қўйган ҳар бир киши гўё турмуш ташвишларидан узилиб, маънавий сукут бағрига кириб боради.
Масжид биноси 1992 йил халқ ҳашари йўли билан барпо этилган ва “Тўйчи ота” номи билан рўйхатга олинган. 2010 йил яна ҳашар йўли билан унинг биносини қайта қуриш ишлари бошланиб, қурилиш ишлари 2011 йил якунига етказилган.
Ҳозирда ушбу масжид ўз бағрига 5000 нафар намозхонни сиғдира олади. Масжиднинг илк номи унга туташ жойлашган “Тўйчи ота” қабристони номига қўйилган эди. Қайта қурилгач, аҳоли таклифи билан уни қайта барпо этишга муносиб ҳисса қўшган инсон – Мирхалил ҳожи ота номи билан атала бошланди.
Масжид хонақоҳи икки қаватли, унда еттита устун ва гумбаз бор. Масжиднинг ғарбий томонига иккита ўн уч метр баландликдаги минора қурилган. Масжид ёнида 1969 йилда ташкил этилган “Тўйчи ота” қабристони жойлашган.
2010–11 йилларда амалга оширилган кенг кўламли қайта қуриш ишлари масжид қиёфасини тубдан янгилади. Икки қаватли кенг хонақоҳ, осмонга бўй чўзган гумбазлар, ғарб томонда қад ростлаган икки минора – буларнинг барчаси ислом меъморчилигининг нафосати билан замонавий ечимлар уйғунлигини акс эттиради. Бугун жоме минглаб намозхонларни бағрига сиғдира олади.
Бу маскан фақат намоз ўқиладиган жой эмас. У – мушоҳада юритадиган, қалбни поклайдиган табаррук даргоҳ. Жума намозлари, ҳайит айёмлари, маърифий суҳбатлар ва Қуръон сабоқлари орқали масжид ён-атрофдаги жамоатчиликни бирлаштириб келмоқда. Айниқса, ёш авлод қалбида иймон, одоб ва масъулият туйғуларини шакллантириш борасида унинг ўрни беқиёс.
Масжид ҳудудида жойлашган “Тўйчи ота” қабристони эса ўтмиш ва бугунни боғлаб турувчи маънавий кўприкдек. Бу ерда инсон ҳаётининг ўткинчилиги, эзгу амалларнинг эса боқийлиги яна бир бор ҳис этилади.
Хулоса қилиб айтганда, “Мирхалил ҳожи ота” масжиди – ўзига хос маънавият маскани. У инсонни ўйлашга, покланишга ва ўзлигини топишга чорлайдиган сокин даргоҳ сифатида эл-юрт хизматида бўлиб келмоқда.
Робия ДАМИН қизи
“Ислом нури” газетасининг 2026 йил 6-сонидан
http://hidoyatuz.taplink.ws