Музей янги бинода фаолият бошлади
Термиз шаҳрида Сурхондарё вилояти тарихи ва маданияти музейининг янги биноси фойдаланишга топширилди.
Мамлакатимиздаги кекса маданий-маърифий муассасалардан бири бўлган ушбу музейга 85 йил муқаддам асос солинган. Музей бир неча бор кўчирилиб, Ҳаким Термизий мажмуасидаги “Мерос” музейи, Термиз шаҳридаги собиқ “Ҳарбий қалъа” ва вилоят хўжалик судининг эски биноларида фаолият юритган.Давлатимиз раҳбари ташаббуси билан уч йил муқаддам вилоят марказидаги Тадбиркорлар биноси музей балансига ўтказилиб, маданий-маърифий муассасага мослаштириш учун йирик ҳажмдаги реконструкция ишлари амалга оширилди. Лойиҳа учун 19 миллиард 500 миллион сўм маблағ ажратилди. Уч қаватли муҳташам бинога 8 та замонавий инфокиоск ўрнатилиб, воҳанинг бой ўтмиши ва бугунини видеотасвирлар ёрдамида намойиш этиш йўлга қўйилди.
Музей экспозицияси беш бўлимдан иборат. Биринчи қаватда табиат, иккинчи қаватда археология ва тарих, тасвирий санъат ҳамда мустақиллик даври, учинчи қаватда этнография бўлимлари жойлашган. Музей фондида 16 йўналишда 61 минг 325 экспонат сақланмоқда. Унинг 3 минг 150 таси ноёб ашё ва коллекциялардир.



Вазирлар Маҳкамасининг жорий йил 30 майдаги қарори билан музей негизида “Термиз” давлат музей-қўриқхонаси ташкил этилиб, унга Термиз туманидаги Зурмала минораси, Эски Термиз ёдгорлиги, Шеробод туманидаги Зарутсой, Жарқўрғон туманидаги Жарқўрғон минораси, Шўрчи туманидаги Далварзинтепа, Музработ туманидаги Окс Александрияси (Кампиртепа) маданий мерос объектлари бириктирилди.
Жонибек ҚЎЗИМУРОДОВ (сурат), ЎзА