Хом гапга пишиқ жавоб: Юрагини тополмайди
Машҳур врач Сергей Боткин Петербург ҳарбий-тиббиёт академиясида дарс берарди. Кунлардан бир кун у танбал талабани учинчи марта имтиҳондан “йиқитади”. Танбалнинг дўстлари профессорга учрашиб, талабанинг аҳволи оғирлигини, боёқиш омадсизликдан изтироб чекиб, алам устида ўзини ўлдирмоқчи эканини айтишади.
– Ортиқча ташвишланманглар! – дейди профессор. – У талаба одам анатомиясини яхши билмайди, шу боис пичоқ санчиш учун юрагиниям тополмайди.