Ҳиндистонда коронавирусга қарши 3 хил вакцина синаб кўриляпти
Ҳиндистонда коронавирусга қарши ишлаб чиқаришга тайёр турган бир йўла учта вакцина синовдан ўтказилмоқда.
«Учта вакцина ҳозир синовнинг турли босқичларида. Олимлар тасдиқлаши билан ишлаб чиқаришни бошлаймиз. Бизда вакцина ҳар бир ҳиндистонликка жуда қисқа вақтда етиб боришини таъминлашга қаратилган йўл харитаси бор», — деди мамлакат бош вазири Нарендра Моди.
Унинг қўшимча қилишича, рақамли соғлиқни сақлаш миллий дастури асосида ҳар бир фуқаро учун шахсий карта (Health ID card) жорий этилади.
«Ҳар бир ҳиндистонлик соғлиги бўйича шахсий рақамга эга бўлади. У ҳар гал шифокорга учраганда ёки дорихонага келганда, саломатлик картасида қайд қилинади ва ушбу маълумот умуммиллий даражадаги профилда акс этади. Шифокор тайинлаган доригача, ҳаммаси фуқаронинг саломатлик саҳифасида кўринади», — деди Моди Ҳиндистон Республикаси мустақиллиги куни муносабати билан Қизил қалъа айвонида сўзга чиқаркан.
Шу куни Ҳиндистон Бош вазири пандемия билан курашаётганларга миннатдорлик билдирди.
Аввалроқ Ҳиндистоннинг “Zydus Cadila” ва “Bharat Biotech” компаниялари коронавирусга қарши “Zy CoV-D” ва “COVAXIN” вакциналарини синовдан ўтказаётганини маълум қилганди. Бундан ташқари, Ҳиндистоннинг яна бир институти ҳам коронавирусга қарши “Covishield” деб номланган вакцина синови якуний босқичда экани хусусида эълон берди. Ушбу вакцина Оксфорд университети ва “Astra Zeneca” компанияси билан ҳамкорликда яратилмоқда, дейилган хабарда.