Қадр кечасида бажариладиган амаллар
Абу Ҳурайра розияллоҳу анҳудан ривоят қилинади. Расули акрам соллаллоҳу алайҳи ва саллам:
“Кимки Лайлатул Қадр кечасини имон ва ихлос билан бедор ўтказса, унинг шу кечагача қилган гуноҳлари мағфират қилинур”, дедилар.
Ривоят қилишларича, Мусо алайҳиссалом Аллоҳ таолога нидо қилиб:
– Илоҳо, сенинг яқинлигингни билишни истайман, – деди.
Аллоҳ таоло:
– Мен Қадр тунида уйғоқ бўлганларга яқиндирман, – деди.
Мусо алайҳиссалом:
– Илоҳо, сенинг раҳматингнинг орзусидаман, – деди.
Аллоҳ таоло:
– Менинг раҳматим Қадр кечасида мискинларга раҳм қилганларгадир, – деди. Мусо алайҳиссалом:
– Илоҳо, сирот кўпригидан яшин тезлигида ўтишни истайман, – деди.
Аллоҳ таоло:
– Қадр кечасида фақирларга садақа берганларни олдинроқ ўтказаман, – деди. Мусо алайҳиссалом нидоларини давом этиб:
– Илоҳо, жаннат боғларида бўлишни ва уларнинг мевасидан тановул қилишни истайман, – деди.
Аллоҳ таоло:
– Қадр кечасида тасбеҳ айтиб, Мени зикр этиш билан машғул бўлганлар жаннат боғларига сазовор бўладилар, – деди.
Мусо алайҳиссалом:
– Илоҳо, дўзахдан нажот топишни истайман, – деди.
Аллоҳ таоло:
– Қадр кечасида истиғфорни кўп айтганлар дўзахдан нажот топадилар, –деди.
Мусо алайҳиссалом яна илтижо қилиб:
– Илоҳо, сенинг розилигингни топишни истайман, – деди.
Аллоҳ ҳақ субҳанаҳу ва таоло:
– Эй Мусо, Менинг розилигимни Қадр кечасида икки ракат нафл намоз ўқиганлар топадилар, – деди.
“Зубдатул воъизин” китобидан