БИР ЮРТ, БИР ЮРАК, БИР ОРЗУ
(Ўзбекистон Республикаси мустақиллигининг 35 йиллигига бағишланади)
Баъзи кунлар борки, улар тақвим саҳифасидаги оддий рақам эмас. Улар миллат тақдирини ўзгартирган, халқнинг қалбига муҳрланган, авлодлар хотирасида мангу яшайдиган муқаддас кунлардир.
1 сентябрь – ана шундай буюк сана.
Бу кунни ҳар гал қарши олганимизда, юрагимизда беихтиёр ғурур уйғонади. Кўзларимиз олдида мовий осмон бағрида ҳилпираётган байроғимиз, дилларни жўш урдирувчи мадҳиямиз, юртимизнинг обод шаҳарлари, сахий далалари, қадимий қадамжолари ва энг муҳими, бахтли инсонлар тимсоли гавдаланади.
Бугун мустақиллигимизга 35 йил тўлди.
Ўттиз беш йил…
Инсон умри учун салмоқли давр. Давлат тарихи учун эса буюк юксалишлар, синовлар ва ғалабаларга бой саҳифадир.
Бу йиллар шунчаки вақт эмас. Бу – эл-юртимизнинг матонати, халқимизнинг фидокорона меҳнати, она юртга муҳаббати, эзгу орзулари билан битилган шарафли достондир.
Озодликнинг баҳоси.
Мустақиллик…
Бу сўзни тилга олган ҳар бир инсон унинг замирида нечоғлик буюк маъно мужассамлигини ҳис қилади.
Мустақиллик – бу фақат сиёсий эркинлик эмас.
Бу – инсоннинг қаддини тик тутиб яшаш ҳуқуқи.
Бу – она тилингда бемалол сўзлаш бахти.
Бу – миллий қадриятларингни эъзозлаш.
Бу – муқаддас динингни эркин адо этиш.
Бу – ўз тақдирингни ўзинг белгилаш имконияти.
Бу – Ватан деган буюк туйғуни юракнинг энг муқаддас бурчагида асраб яшашдир.
Бу неъматнинг ҳақиқий қадрини уни қўлдан бой берган халқлар яхши билади.
Дунёда шундай юртлар борки, болалар мактаб овозидан эмас, портлаш садосидан уйғонади. Оналар фарзандларини бағрига босиб эртанги кундан хавотирда яшайди. Қадим шаҳарлар харобага айланган, инсонлар эса тинч осмонни энг катта орзу деб билади.
Шундай пайтларда инсон бир ҳақиқатни қалбан англайди:
Тинчлик – Аллоҳнинг энг улуғ неъмати.
Мустақиллик эса ана шу тинчликнинг мустаҳкам қалъасидир.
Она Ватан – она каби ягона.
Дунёда она ўрнини ҳеч ким босолмаганидек, Ватаннинг ҳам муқобили йўқ.
Унинг ҳар бир қарич тупроғи азиз. Унинг ҳар бир дарахти, ҳар бир булоғи, ҳар бир кўчаси инсон хотираси билан боғлиқ.
Кимдир илк бор мактабга шу ерда қадам қўйган.
Кимдир онасининг қўлидан ушлаб биринчи бор мустақил қадам ташлаган.
Кимдир илк муҳаббатини шу юртда учратган.
Кимдир фарзандининг илк “Она” деган сўзини шу тупроқда эшитган.
Шунинг учун ҳам Ватан инсон учун шунчаки яшайдиган жой эмас.
У – хотира.
У – муҳаббат.
У – қисмат.
У – ҳаётнинг ўзи.
Халқнинг буюк қудрати.
Сўнгги 35 йил давомида Ўзбекистон бутунлай янгича қиёфа касб этди.
Кечаги орзулар бугун ҳақиқатга айланди.
Замонавий шаҳарлар барпо этилди.
Юзлаб янги мактаблар, университетлар, болалар боғчалари, шифохоналар, саноат корхоналари ишга тушди.
Янги темир йўллар, аэропортлар, кўприклар ва автомобиль йўллари мамлакатни янада яқинлаштирди.
Лекин мамлакатнинг ҳақиқий қудрати бетон ва темирда эмас.
У инсон қалбида.
У меҳнаткаш қўлларда.
У илмга чанқоқ ёшларда.
У фарзанди учун тунларни бедор ўтказган оналар дуосида.
У Ватан осмонини қўриқлаётган ҳарбийнинг садоқатида.
У ўқитувчининг сабоғида.
У шифокорнинг меҳрида.
У деҳқоннинг пешона терида.
Ана шу меҳнатлар мамлакатнинг энг мустаҳкам пойдеворидир.
Янги авлод – Янги Ўзбекистоннинг таянчи.
Бугунги ёшлар кечаги авлод орзу қилган имкониятларга эга. Улар хорижнинг нуфузли университетларида таҳсил олмоқда. Илм-фанда кашфиёт қилмоқда. Спорт ареналарида Ўзбекистон байроғини баланд кўтармоқда. Ахборот технологиялари, сунъий интеллект, тиббиёт, муҳандислик, тадбиркорлик соҳаларида юртимиз номини дунёга танитмоқда.
Уларнинг кўзида қўрқув эмас – ишонч бор. Юрагида иккиланиш эмас – орзу бор.
Чунки мустақиллик уларга эркин фикрлашни, изланишни ва ўз иқтидорини намоён этиш имкониятини берди.
Байроқ баланд кўтарилган лаҳза…
Спорт мусобақасида ғолиб чиққан ўзбекистонлик спортчи шоҳсупага кўтарилади.
Мовий, оқ ва яшил рангли байроғимиз секин юқорига кўтарила бошлайди.
Мадҳиямиз янграйди.
Ана шу лаҳзада миллионлаб юраклар бир хил уради.
Кимдир кўз ёшига эрк беради.
Кимдир қўлини кўксига қўяди.
Кимдир фарзандига қараб: «Сен ҳам шу байроқни баланд кўтаргин», деб ният қилади.
Чунки байроқ – шунчаки мато эмас.
Унда миллатнинг шаъни бор.
Мадҳия – шунчаки мусиқа эмас.
Унда халқнинг юраги уради.
Ватан – шунчаки ҳудуд эмас.
Унда бутун бир миллатнинг тарихи, ғурури ва келажаги мужассам.
Мустақиллик – муқаддас омонат.
Мустақилликни фақат байрам қилишнинг ўзи камлик қилади. Уни асраш керак. Уни меҳнат билан мустаҳкамлаш керак. Уни билим билан юксалтириш керак. Уни ҳалоллик билан ҳимоя қилиш керак. Чунки бу неъмат бизга тайёр ҳолда берилмаган. Унинг ортида халқнинг сабри, жасорати ва эзгу орзулари мужассам.
Энди эса уни келажак авлодга янада қудратли, янада фаровон, янада обод Ўзбекистон сифатида топшириш – ҳар биримизнинг муқаддас бурчимиздир.
Ватанга муҳаббат – юрак амри.
Ватанни севиш баландпарвоз шиорлар билан эмас, ҳар кунги ҳалол меҳнат билан намоён бўлади. Кўчани озода сақлаш ҳам Ватанга муҳаббат. Бир туп кўчат экиш ҳам Ватанга муҳаббат. Билим олиш ҳам Ватанга муҳаббат. Ота-онани эъзозлаш ҳам Ватанга муҳаббат. Қонунга ҳурмат билан қараш ҳам Ватанга муҳаббат.
Чунки Ватан ҳар биримизнинг кичик амалларимиздан буюк келажак яратади.
Энг буюк бойлик.
Бугун биз тинч юртда яшаяпмиз. Фарзандларимиз мактабга эркин бормоқда. Масжидларимизда азон садоси янграмоқда. Кўчаларимизда болаларнинг кулгуси эшитилмоқда. Бунинг ўзи улкан бахт.
Шунинг учун ҳам мустақилликни қадрлаш – бу ҳаётни қадрлаш демакдир.
Тинчликни асраш – келажакни асраш демакдир.
Ватанни севиш – ўзингни севиш демакдир.
Хулоса ўрнида.
Мустақиллигимизга 35 йил тўлди. Бу йиллар давомида Ўзбекистон ўз йўлини топди, ўз сўзини айтди, ўз нуфузини мустаҳкамлади.
Аммо энг катта ютуғимиз – халқимиз қалбидаги ишончдир. Ишонч бор жойда тараққиёт бўлади. Бирлик бор жойда қудрат бўлади. Меҳр бор жойда бахт бўлади. Ватанга муҳаббат бор жойда эса мустақиллик мангу яшайди.
Юрагимизда битта ният яшайди:
Осмонимиз ҳамиша мусаффо бўлсин!
Байроғимиз доимо баланд ҳилпирасин!
Онажонларимиз дуоси, отахонларимиз розилиги, фарзандларимиз кулгуси юртимизни тарк этмасин!
Аллоҳ азиз Ўзбекистонимизни тинчлик, фаровонлик, ҳамжиҳатлик ва баракадан айирмасин!
Мустақиллигимиз мангу бўлсин!
Яшнасин она Ўзбекистонимиз!
35 йиллик мустақиллик байрами барчамизга муборак бўлсин!
Иброҳимжон домла ИНОМОВ,
“Шамсуддинхон Бобохонов” НМИУ Даврий нашрлар бўлими бошлиғи